World Veterinary Day hman a ni

April 28, Inrinni kha World Veterinary Day a ni a, AH&Vety department leh Mizoram State Veterinary Council (MSVC) huaihawtin district hrang hrangah hman a ni. Day pual hian AH&Vety doctor-te'n a thlawna ran entirna an buatsaih.

World Veterinary Day hi Champhaiah chuan Vety Hospital-ah hman a ni a; Champhai district veterinary officer Dr M Zohmingthangi chuan, ran leh a vulhtute hriselna a inzawm tlat tih sawiin, ran vulhte chu duat taka an ran vulhte enkawl a, an hriselna ngai pawimawh tur leh hri danna pek ngaihsak leh zual turin a chah.

Champhaiah hian World Veterinary Day pualin a thlawna ran entirna leh hri danna pek hun buatsaih a ni a; ran 263 enfiah niin, ui a danna hri (ARV) 17 pek a ni.

Lawngtlaiah pawh World Veterinary Day pualin AH&Vety office-ah a thlawna ran entirna leh ui a hri venna (vaccine) pekna hun buatsaih a ni a; Vety doctor-te'n a thlawnin ran eng emaw zat an en bakah, ui 37 chu ui a hri venna pek a ni.

Mamitah chuan Veterinary Dispensary-ah World Veterinary Day hman a ni a, Dr PC Lalrokima'n Day hman chhan te, ran vulh enkawl dan leh hri danna lak ṭhat pawimawiziate a sawi. He hunah hian Mamita Vety doctor-te'n ar 238, vawk 28, ui 31 leh varak pakhat, a vaiin ran 298 an enfiah a, ui pariatte ui a hri danna an pe bawk.

World Veterinary Day hi World Veterinary Association (WVA) thutlukna angin kum 2000-ah hman ṭan niin, April thla Inrinni hnuhnung berah hman ṭhin a ni a; kumina thupui chu 'Role of the Veterinary Profession in Sustainable Development to improve Livelihood, Food Security and Safety' tih a ni.