Gram Swaraj Diwas hman a ni

Rural Development department bultumin April 28, Inrinni khan Mizoram hmun hrang hrangah Gram Swaraj Diwas (thingtlang khuate intodelhna ní) hman a ni.

Gram Swaraj Diwas hi Champhaiah chuan IPR conference hall-ah hman a ni a; khuallian Lalrinliana Sailo, MLA chuan, sorkar laipui scheme kalpuite a hlawhtlinna tak tak hmu tur chuan mumal leh uluk zawka thingtlang kilkhawr ber thleng pha leh huapzo neih a ngaih thu a sawi a, "Chumi tur chuan Gram Swaraj Abhyaan kalpui mek a ni. Sorkar scheme leh ṭanpuina lo kalte hman dan a dik loh chuan a tuartu chu keimahni tho kan ni dawn a ni," a ti.

Lungleiah chuan Gram Swaraj Diwas hi Cultural Heritage Centre-ah hman a ni a, khuallian Lunglei SDO(S) Lalnundika chuan, campaign-in a tum ber chu, khawtlang inlungrualna siam leh mirethei dâwm kân a nih thu a sawi.

Gram Swaraj Diwas hi Serchhipah chuan DC conference hall-ah hman a ni a, DRDA project director VL Remliana chuan, sorkar laipui hmalaknain Gram Swaraj Diwas chungchang inzirtirna hun hi April 14, 2018 aṭanga ni May 5, 2018 chhunga neih tur a nih thu sawiin, "Mipuite hnenah hmasawnna atana remna leh muanna pawimawhna te, mirethei chawikanna scheme-te'n miretheite hnen a thlen ngei theih nana hmalakna te, sorkar scheme kal mek tihhmasawnna turte leh faina kawnga ṭan lakna tur kawng hrang hrangte hrilhhriat hi a thil tum a ni," a ti.