Champhaiah CM Housing Scheme hawn a ni

Chief Minister's Rural Housing Scheme chu Champhai district tan April 28, Inrinni khan MLA Lalrinliana Sailo-in Champhaia CHANEM building-ah a hawng.

He scheme hi New Economic Development Policy (NEDP) hnuai­a khawsak harsa zawkte in sak ṭanpuina tur a ni.

CM Rural Housing Scheme hawnna inkhawm hi Champhai DC Vanlalngaihsaka'n a kaihruai a; Lalrinliana Sailo chuan, CM Lal Thanhawla chu mirethei zawkte dinhmun hrethiam­tu a nih thu sawiin, "CM Housing Scheme hi NEDP hnuaia scheme pawimawh tak a ni a, in sakna tur pawisa hian in thar sakna daih lo mah se, fûrpui thlen huna thli leh ruah laka him lo tur inte thawm ṭhatna a nih dawn avangin a chhenfakawm a ni," a ti.

Lalrinliana Sailo chuan, CM Rural Housing Scheme chu a mamawh leh dawng tlakte chauhin an dawn theihna turin nodal department leh khawtlang hruaitute ṭanho a pawimawh dawn tih sawiin, a dawng tur thlang kawngah fimkhur turin a chah a ni.

Champhai DRDA project director Zosangzuali Pachuau sawi dan­in, CM Rural Housing Scheme hnuaia financial year 2017-18 chhunga hmalakna atan Champhai, Kolasib, Mamit leh Aizawl district-te thlan a ni.

District pali aṭang hian beneficiary mi 2,000 vel awm tura ruahman a ni a, in pakhat sak nan Rs. 50,000 zel instalment-a pek a ni ang. In sak hna chu contractor leh mi dang kuta dah a rem dawn lo a, IAY leh PMAY dawngte a huam lo.