Kawng chhia vangin MLA báng turin phût ; Chawngteah pisa kái tur an dang dawn
Chhûmkhûm-Chawngte Road Monitoring Committee leh Chawngte khuaa pawl hrang hrangte chuan kawng chhia ngaihthaha an hriat vangin MLA pathum - C Ngunlianchunga, Dr BD Chakma leh Dr K Pachhunga te MLA aṭanga báng turin an phût a; vawiin aṭangin Chawngtea sorkar pisate dan an tum bawk.
Monitoring Committee leh Chawngtea pawl hrang hrang hruaitute September 29, Nilainia ṭhukhawm chuan thuchhuah siamin, Chhûmkhûm-Chawngte kawng chhe lutuk chu sorkarin a ngaihthah nia an hriat avangin lungawilohna lantir nan vawiin hian Chawngte khuaa sorkar pisate leh bank-a thawkte pisa kai tur an dang dawn tih an tarlang.
Chawngtea NGO-te leh Monitoring Committee hian Chhûmkhûm-Chawngte kawng chhia chungchang chu PWD changtu chief minister Zoramthanga hnenah thlenin, siamṭha thuai tura ngenna an thlen tawh a; an ngenna chu September 30, 2021 thleng pawha ngaihṭhatna leh lungawina khawp hmalakna a awm loh avangin lungawi lohna lantir an rél a ni.
Kawng chhia chungchangah hian MLA pathum - Lunglei South bialtu Dr K Pachhunga, Tuichawng bialtu Dr BD Chakma leh Lawngtlai West bialtu C Ngunlianchunga te chu an bial mipui harsatna ngaihthahah puhin Monitoring Committee leh NGO-te chuan MLA an nihna aṭanga báng turin an phût a; Chhumkhum-Chawngte kawngah hian a bik takin Lungrang-Chawngte (km. 18) chu DPR-a a lan ang ngeia siam leh vek turin an phût bawk.
Chawngtea NGO-te leh Monitoring Committee chuan kawng siam hna thawktu APS Hydro Pvt. Ltd. chu an hmanruate hna an thawhna hmun aṭangin la chhuak lo turin a hriattir a; "Kan thil phûtte tihhlawhtlin leh ngaihsak loa a la awm fo a nih chuan tun aia nasa zawka hmalak chhunzawm a ni ang," an ti.