Mipui thinlungah faina tuh a pawimawh - Deputy Chief Minister

Ministry of Jal Shakti hnuaia Department of Drinking Water & Sanitation-in India rama thingtlang khuate fainaa an inelna tura a buatsaih Swachh Survekshan Grameen, 2021 chu Mizorama kalpui ṭan turin nimin khan PHE changtu deputy chief minister Tawnluia'n a pisaah a hawng. Tawnluia chuan, mipui thinlungah faina pawimawhna tuh a pawimawh thu a sawi.

Deputy Chief Minister chuan, Swachh Survekshan Grameen-ah kum dang aia ṭha zawka ti tura ṭan lak a pawimawh thu sawiin, "Lawmman beisei ngawr ngawr piah lamah kan in leh a vel te, khawlaite tifai tura infuih a pawimawh. Min endik emaw, endik lo emaw, kan thinlungah faina pawimawihna kan intuh a pawimawh," a ti.

Tawnluia chuan, "Invawn thianghlim hi hriselna, changkanna leh mawina a ni a, chu chu mipui thinlungah kan tuh thei a nih chuan inelna hlawhtlinna ber tur a ni ang," a ti a; mipui pawhin changkanna leh hmasawn an duh chuan faina an ngaih pawimawh a ṭul thu a sawi.

Swachh Survekshan Grameen hnuaiah hian India ram pumah khaw 17,425 vel endik tum a nih thu sawiin Dy. CM chuan, "Mizoramah khaw engzat nge an endik dawn, khawi khua nge an endik dawn tih hriat lâwk theih a ni lo. Chuvangin, endik tlaka khaw tin kan invawn thianghlim a ṭul. Thawktute pawhin theihtawp an chhuah a ngai," a ti.

Swachh Survekshan Grameen hi kum 2018-ah ṭan a ni a, kum 2019 khan Mizoram chuan smaller state & UT leh hmarchhak state bikah pakhatna lawmman a dawng. Tehfung pathum a awm a, chungte chu - mobile phone hmanga mipui feedback aṭang te, khaw thlan bik endikna aṭang leh district tinin an hnathawh an report aṭangtein a ni.