MP-te'n central puihna ngen

Lok Sabha MP C Lalrosanga leh Rajya Sabha MP K Vanlalvena te chuan September 29, Nilaini tlai khan Ministry of Health & Family Welfare secretary Rajesh Bhushan chu a pisaah an kâwm a, Mizoramin Covid-19 vanga harsatna a tawh mekah sorkar laipui ṭanpuina an ngen.

Sorkar thuchhuah tarlan danin, C Lalro­sanga'n Mizoram din­hmun tlangpui a sawi a, "Hripui vei mek leh ni tin kái thar an pun chak avangin Mizoram chuan he hripui do nan hian damdawi leh Covid dona hmanraw tam zawk a mamawh a ni," a ti a; sorkar laipui ṭanpuina Mizoramin a mamawh tak zet thu a sawi.

Union Health Secretary chuan, Covid-19 dona atan sorkar laipuiin state leh union territory zawng zawng tana a pek Emergency Covid Response Package (ECRP) hnuaiah Mizoram chu cheng vbc 44.38 pek a nih dawn thu a lo hrilh a, "First instalment-ah cheng vbc 19.94 pek a ni tawh a, first instalment hmanna thehluh a nih veleh a bak pawh pek chhuah leh nghal tur a ni," a ti.

Mizoram MP-te hian Mizoramin Covid-19 vaccine pek kawngah a tih ṭhat viau rualin, hripui vei an pun chak êm avangin ICU khum tam zawk, khawl ṭha leh RT-PCR mobile van a mamawhna a nasat thute an sawi a; ECRP hnuaia Mizoram tana sum ruahman pangngai piah lamah sorkar laipui ṭanpuina Mizoramin a mamawh tak zet thu an sawi bakah, Mizorama Covid-19 dinhmun uluk taka zir chiang tur expert team tír turin an ngen.

Rajesh Bhushan chuan, MP-te thu thlente chu thuneitu sang zawkte a sawipui tur thu te, Mizoramah expert team tirh thuai a nih tur thu te, Covid-19 vei damlote enkawlna damdawi mi pakhatin Rs. 60,000 sénga an khai tel ṭhin chu Mizoram tan an pek theih thu te, Mizoram harsatna sukiang tur leh a ṭul anga sum leh pai ṭanpuina pe turin theihtawp chhuah a inhuam thute a sawi bawk.