KHAWTHLIR

Thisen pe
Pachhunga University College NSS chuan PUC kum 50 tlin pualin nimin khan an college-ah thisen pek an huaihawt a, NSS volunteer 204-in Civil Hospital, Aizawl tan thisen an pe a, petute mipa 154 leh hmeichhia 50 an ni. KṬP, Lunglei Chanmari Bial pawhin nimin khan Lunglei Civil Hospital tan Chanmari Kohhran Sunday School Hall-ah thisen unit 36 an pe a, petute mipa 29 leh hmeichhia pasarih an ni.

Hman theih
Aizawl Municipal Corporation chuan, Aizawl veng hrang hranga vantlang inthiarnate chu mamawhtu apiang tan eng lai pawha hman theih tura tih a nih thu a tarlang. Vantlang inthiarna chungchanga fakna, sawiselna leh thuràwn pekna tur QR code tàr vek a nih avangin, vantlang inthiarna hmang ṭhinte chu feedback pe ṭhin turin an ngen.

Webinar buatsaih
September 29 zan khan Human Resource Development Board chuan educational technology zirhona webinar an buatsaih. Webinar-ah hian tools and methods of e-contents creations leh e-content delivery and Learning Management System-te zirho a ni a, middle school, high school leh higher secondary school zirtirtu 1,800 vel an tel.

Rúlin chuk hlum
Zonunfela (10) s/o Lalramfela, Saipum chu September 29, Nilaini tlai dar 5:30 vel khan Chawngkawrin a chuk a, zanah a thi. Thu dawn danin, Zonunfela hi a pa leh a unaupate nen Tuirialah an riak a, tui chawi tura lawnglenga an kalna lamah lawnglengah Chawngkawr a lut a, Chawngkawr chuan a ke-ah a chuk a ni. Zonunfela hi damdawi-inah anti-venom hmangin chiu ni mah se, an chhan hman ta lo niin an sawi.

CMRF for Covid-19
Chief Minister Relief Fund for Covid-19 ah nimin khan Mizoram Govt. Adhoc Aided High School Teachers Association-in Rs. 11,60,766 an chhûng lut. Nimin thlenga CMRF for Covid-19 a sum lut tawh chu Rs. 31,22,97,944 a ni a, Rs. 29,70,30,470 hman tawh niin, hman loh Rs. 1,52,67,474 a la awm.