Vairengte - Sairang kawngpui zauh turah Zangnadawmna dawng tur tihfel a la ni lo

Ministry of Road Transport & Highways (MoRTH) hnuaia national highway enkawltu NHIDCL-in NH-06 leh NH-306 (Vairengte leh Sairang inkar) kawng an zauh turah zangnadawmna dawng zat tur leh an dawn tur zat tihfel a la ni lo.

Kawngpui zauh a nih dawn avanga mimal ram lâk tura thuneitu competent authority for land acquisition (CALA) atana ruat Lawmawma, Kolasib additional DC chuan Vanglaini palai zawhna chhangin, zangnadawmna dawng tur tihfel a la nih loh thu a sawi a, "A theih chin chin chu kan tifel tawh. NHIDCL hian zangnadawmna lakna tur tak (declaration) thehlut turin min la ti lo a, kan buaipui mek zel," a ti.

CALA chuan, zangnadawmna dawng tur an la tihfel hnai loh thu sawiin, "NHIDCL pawhin project hi an la final tak tak lo a, preliminary survey an buaipui mek. Zangnadawmna chungchangah preliminary survey kan zo vek tawh," a ti a; tunlai hian Vairengte lamah ram leh thlai hlut záwng chhût mek a nih thu a sawi.

NHIDCL-te declaration-a an hmanhmawh loh chhan an hriat loh thu sawiin Lawmawma chuan, "Han tihfel vata pek leh lawk si loh khan a interest-te pawh an ui a ni ve thei a, an rilru chiah kan hre bik lo," a ti.

CALA chuan, VC pass neitute'n ram hlutna man an dawn theih nan pass nung (periodic patta) siamsakte chu zangnadawmna dawnna atan pawm a nih dawn leh dawn loh a hriat bik loh thu sawiin, "Keimahni a rawn kaltlang tho ang a, kan thun theih leh theih loh chu NHIDCL kut a nihnate a awm ve," a ti a, VC pass-te periodic patta-a leh a nih hnua an tih zel dan tur a la hriat bik loh thu a sawi.

Tarlan tawh angin, ZPM leader Lalduh­oma, MLA chuan September 10, 2021 khan Vairengte leh Sairang inkar kawng four lane-a siam turah dan loa periodic patta siama zángnadawmna lak tum an awm thu a lo sawi tawh a, "Revenue Minister thu lo chuan tih chi rual a ni lo," a ti.

Land Revenue & Settlement (LRS) minister Lalruatkima chuan September 13, 2021 khan Vairengte leh Sairang inkar kawng zauh a nih dawn avanga ram lâk tur VC pass-te periodic patta-a let tura hmalaknaah dan kalha thil tih a awm lo niin a sawi ve thung a, mipui hmakhaw ngaih vanga ti an nih thu a sawi a ni.

LRS Minister chuan, NH Act hnuaiah notification chhuah a nih tawh avangin zangnadawmna la tura inngai pass nung nei lote'n an ram hlutna man an dawn ve theih dawn loh thu a sawi a, "Hei hi valid pass nei lote manganna a ni. The Mizoram (Land Revenue) Act, 2013 amend a ni a, Section 17(A) belh a ni," a ti a; April 21, 2020-ah notification chhuah a nih thu a sawi.

Mizoramah mi eng emaw zatin valid pass nei lo mah se, ram enkawl ve reng an tam tih sawiin Lalruatkima chuan, "Hetianga phalna nei loa ram enkawl hi a enkawltu tan a him loh bakah, sorkar pawhin chhiah a lâk theih loh avangin eng emaw zat kan chán. MLR Act-a Section 17(A) belh hi valid pass nei lo ram enkawltute pass siamsak theihna a ni," a ti.

September 13-ah vêk Lalduhoma chuan, VC pass thehluh tawhte chu periodic patta-a siam theih a la nih chuan a duhsak a, a lawmpui thu sawiin, "Tualchhung mite leh a ram neitute ngei an nih chuan kan duhsak tak zet," a ti a, sorkarin a ti thei a nih chuan thil lawmawm a nih thu a sawi.

Lalduhoma chuan, a duh loh chu - VC pass-te periodic patta-a siamsak tura buai­puitute'n zangnadawmna dawn tur aṭanga 75% ei tuma affidavit sign tir an tum chu a nih thu a sawi a, "Ram neitute'n an zangna­dawmna dawn tur chu a vaiin nei rawh se. Tute emaw an pe ve phal a nih chuan an thu a ni a, intiamkamna affidavit meuh ziak a, 'Ka dawn tur aṭanga 75% hi ka theh chhuak ve ang' tihtir tum hi ka dem a ni," a ti.