COVID-19: Mizoram dinhmun ; Hripui vei 1,741 hmuh belh a ni

September 29, Nilaini khan Mizoramah Covid-19 vei mi 1,741 hmuh chhuah a ni a, ni khata hmuh chhuah tam ber dawttu niin, India ramah Mizoram aia hripui vei hmuh thar tam zawkna Kerala leh Maharashtra chiah a awm.

Nimin khan hripui vei dam tawh mi 1,024 chhuahtir an ni a, mi pathum an thi.

Covid-19 vei Nilainia hmuh tharte chu mipa 821 leh hmeichhia 920 an ni a; ZMC laboratory-a hmuh chhuah 420, TrueNAT hmanga hmuh 38, RAT hmanga hmuh 1,263 leh Fluorescent Immunoassay (FIA) hmuh 20 an ni.

IDSP record angin, Mizoramah Covid-19 vei 93,660 hmuh chhuah a ni tawh a, mipa 46,361 leh hmeichhia 47,299 an ni. Nimin tlai dar 5 thleng khan mi 77,536 (82.78%) chhuahtir an ni tawh a, mi 309 (0.33%) thi tawhin, enkawl mek mi 15,815 (16.89%) an awm.

September 29, Nilainia Covid-19 vei hmuh thar mi 1,741-te chu symptom nei 777 leh nei lo 964 an ni a; tualchhunga kái mi 1,738 leh tun hnaia state pawn aṭanga rawn lut mi pathum niin, tualchhunga kái zingah hri an kàina chin hriat loh 842 an awm.

Hripui vei hmuh thar mi 1,741 zingah nausen kum khat tling lo 27 an awm a, an zingah symptom nei an awm nual; a naupang ber chu kar khat mi a ni. Kum 70 chung lam mi 59 an awm a, an zinga 24-in symptom an nei a; kum 90 chung lam pathum awmin, a upa ber chu kum 95 a ni.

Nilainia RAT hmanga sample endik rûnpui neihna zingah Champhai district-a Khuanglengah Covid-19 vei mi 178 hmuh chhuah a ni a; Ngúr khuaah mi 107 hmuh chhuah a ni bawk. September thla ni 29 chhungin hripui vei mi 33,660 hmuh chhuah a ni tawh a, chawhrualin ni tin mi 1,160.69 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 93,660 chu mi 1,000 zelah hripui vei mi 85 an awm ang a ni a; mi 1,00,000 zela Covid-19 vangin mi 28 an thi tawh ang a ni.

Nimin khan tlai dar 5 thlengin hripui vei dam tawh mi 1,024 chhuahtir an ni a; Aizawl district-ah mi 794, Serchhip district-ah 68, Kolasib district-ah 47, Champhai leh Mamit district-ah 35 ve ve, Hnahthial district-ah 16, Lunglei district-ah 15 leh Khawzawl district-ah mi 14 an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh 93,660 zinga mi 89,148 chu Mizoram chhunga kái chhâwng an ni a, mi 4,513 chu Mizoram páwn aṭanga an rawn luh hnua hmuh chhuah an ni.