Vawk vulhtute'n zangnadawmna an hmuh theih nan sorkarin hma a la - MNYF

MNF ṭhalaite chuan thuchhuah siamin, Mizorama African Swine Fever (ASF) léng avangin Mizoram pumah vawk vulhtute'n harsatna nasa tak an tawh mekah Mizoram sorkarin theihtawp chhuahin hma a la a, vawk vulhtute'n zangnadawmna an hmuh theih nan sorkarin hma a lak mek thu an tarlang.

MNYF chuan, ASF vanga vawk thi neitute zangnadawmna pek chungchangah Mizoram sorkar chu sorkar laipui puihna chauh nghak angin Congress ṭhalaite'n an sawi chu pawi an tih thu an tarlang a, "AH&Vety minister Dr K Beichhua chuan theihtawp chhuahin central sorkarah hma a la mek zel a, he thu buatsaih lai thleng pawhin department secretary-te pawhin an la bawhzui reng bawk," an ti.

MNF ṭhalaite tarlan danin, sorkar laipui aṭanga ṭanpuina state sorkarin a do lêtna tur, state matching share 50:50 ni tura ruahman chu 90:10 a nih theih nan Mizoram sorkarin sorkar laipui a ngen a; sorkar laipuiin a pek theih loh tur thu sawi an nei lo a, Mizoram sorkarin beiseina sang tak a nei a ni.

Hri vanga vawk thi, suat ni kher lote pawh ṭanpuina pek a nih theih nan State Disaster Management-ah chhiatrupna anga puang tura ngen a nih thu sawiin MNYF chuan, "File a kal mek a, Chief Minister pawhin a pawmpui tawh. ASF avangin vawk a la thi mek zel a, vawk vulhtute pawhin dawhthei taka sorkar hmalakna hrethiam hrâm hrâm turin kan ngen a ni," an ti.