India rama Covid-19 vei hmuh thar tam lamah Mizoram pathumna a ni

Sorkar laipuiin nimin zinga Covid-19 positive report a tihchhuaha a lan danin, September 29 khan Mizoram aia hripui vei hmuh chhuah tamna state pahnih - Kerala (12,161) leh Maharashtra (3,187)-te chiah an awm a; hripui vei enkawl mek (active case) tam lamah Mizoram chu palina a ni.

Nimin zinga Covid-19 report-a a lan danin, India ramah hripui vei hmuh chhuah thar mi sang khat aia tamna state dang pahnih Tamil Nadu (1,624) leh Andhra Pradesh (1,084) an awm a; mi sang khat hmuh tlinna state leh union territory dang a awm lo.

India hmarchhak state pariat zingah Mizoram chu hripui vei hmuh thar tam berna a ni leh a, a záwnin ni 38 chhung hmuh tamna ber a ni tawh. NE state pariatah Covid-19 positive 2,717 hmuh chhuah niin, chu'ng zinga 1,741 (64.08%) chu Mizorama mite an ni a; NE state dang pasariha hmuh thar mi 976 aiin Mizoram ringawta hmuh thar 765-in an tam zawk.

Nimina report tihchhuah a nih hnuah Mizoramah Covid-19 vei enkawl lai (active case) 16,841 an awm a, an tam lai ber a ni. India ram pumah Mizoram aia active case tamna state pathum - Kerala (1,44,075), Maharashtra (40,252) leh Tamil Nadu (17,192)-te chiah a awm a; heng state dangahte hian active case an tlakhniam hret hret laiin, Mizoramah a pung hret hret zel thung.

Hmarchhak state zingah Mizoramah Covid-19 active case a tam fál a; hmarchhak puma active case 26,893 zinga 62.62% (16,841) chu Mizorama mite an ni a, NE state dang pasariha active case belh khawm mi 10,052 aiin Mizoram ringawtah mi 6,789-in an tam zawk.

Covid-19 vei hmuh chhuah tawh zawng zawng aṭanga thi tawh zat percentage-ah erawh chuan Mizoram a la hniam ber zel a ni.