Covid-19 vangin mi 309 thi tawh

Nimin khan tlai dar 5 thlengin Covid-19 vangin mi pathum an thi. Sorkar chhinchhiah angin, nimin tlai dar 5 thleng khan Mizoramah Covid-19 vangin mi 309 an thi tawh a, September thla bikah mi 92 an thi tawh.

Zakamlovi (90), Chanmari, Aizawl chu hripui vangin nimin zing dar 4:43 khan State Referral Hospital (ZMC)-ah a thi a; Covid-19 positive a ni tih September 27 khan hmuh chhuah niin, SRH-ah dah luh nghal a ni a, natna dang nei sa a ni.

Nimin chawhma dar 10:35 khan Punsangdi Dangmei (43), CRPF, Zemabawk chu hripui vangin SRH-ZMC-ah a thi. Amah hi natna dang nei sa a ni a, Covid-19 vei a ni tih September 13 khan hmuh chhuah niin, September 19 aṭangin SRH-ah enkawl a nih thu sorkar thuchhuakin a tarlang.

Lalchhandami (62), Muanna Veng, Aizawl pawh nimin chawhnu dar 1:40 khan hripui vangin SRH-ZMC-ah a thi. Covid-19 positive a ni tih September 28 khan hmuh chhuah niin, SRH-ah dah luh nghal a ni a, natna dang nei tel a ni.