Ráltlânte sikul kái dan tur sawiho
School Education minister Lalchhandama Ralte hoin zirna lama sorkar hotute'n September 29, Nilaini khan Myanmar ráltlân zinga sikul kai rual naupangte'n zirna an chhunzawm theih dan tur an sawiho. Thil pawimawhte la khawmin, tunkarah sorkar laipuiah thawn an rêl.
Ṭhutkhawmah hian district hrang hranga district education officer (DEO)-te'n an district chhunga ráltlân zinga naupang sikul kai rual awm zat leh sikul kaitirna tura mamawhte an sawi a; MBSE hnuaia pawl 10 leh 12-te an exam ve theih dan tur pawh sawiho a ni.
Mizorama Myanmar ráltlân zinga zirlai awm zat aṭangin hmalak zel a nih theih nan data ṭulte la khawmin ruahmanna an siam a; chu chu sorkar laipuiah tun kar chhunga thawn thlak tura hmalak a nih thu an tarlang.
Minister Lalchhandama Ralte chuan, "Myanmar ráltlânte hi kan unaute an nih bakah kan mihringpuite an nih ang pawha kan ngaihvena kan chhawmdawl hi kan tih tur a ni," a ti.
Ṭhutkhawmah hian School Education secretary Dr Lalzirmawia Chhangte bakah, School Education, SCERT, MBSE leh Samagra Shiksha hotute leh district tina education officer-te an tel a ni.