ZPM-in an candidate tur an puang

Zoram Peoples' Move­ment party chuan nimin khan an pisaah October 30, 2021-a Tuirial Assembly constituency by-election neih tura an party candidate tur an puang a; an candidate tur Laltlanmawia, Kolasib Hmarveng chu thutiam an neihpui nghal.

Candidate puangtu ZPM president Lallian­sawta chuan, "Kan MLA duh tak Pu Andrew H Thangliana’n hun lo taka min boralsan avanga by-election neih a ngai ta hi kan party tan chànna nasa tak a ni a, a duh ang leh a tumte tipuitling turin theihtawp kan chhuah zui dawn. Tuirial bial mipui kutah kan innghat a, sum leh therhlo vanga rilru danglam ve ngai lo, bial zahawm tak ni zui turin kan duh a ni," a ti.

Candidate tur Laltlan­mawia chuan, MLA candi­date atan ZPM-in an thlang chu ropui a tih thu sawiin, "Kei tehlulin sàwmna ka dawng hi a ropui ka ti tak zet. Kal­phung thar, mipui sorkar din tum ZPM party tan hnehna chang turin chhuan tur ka nei lo a, sum leh pai hmachhuana ding tur chu ni ila, ka tan beisei tur a awm lo," a ti a; Pathian hmachhuanin inthlan a chuh dawn thu a sawi.

Laltlanmawia hian ZPM Val Upa Council vice chairman Bualhranga kaihhruaina hnuaiah ZPM party-in inkaihhruaina pariat a siamte laka rin­awm turin thu a tiam a ni.