Serchhipa dan loa sum peipunnaah Pawisa táng nuai 500 chuang a awm; Police-a FIR thehlut duh an awm lo
Bank aia pung sang zawka pe thei nia insawia mi pawisa la khawm ṭhin Jenny Malsawmtluangi w/o Vanlalvena, Serchhip Dinthar Vengin a hnena sum dah, a la pek chhuah loh cheng nuai 500 chuang a awm. He thilah hian police station-a FIR thehlut duh an awm lo.
Vanglaini palaiin Serchhip police aṭanga thu a dawn danin, Jenny Malsawmtluangi hnena sum dahtu chu mi 53 anga ngaih an ni a, mahse, mi pakhat hminga indah ṭâwmte an awm avangin sum dahtu zawng zawng chu mi 70 chuang an ni. Chung mite sum dah, Jenny-i'n a la pek chhuah loh chu cheng nuai 500 chuang a ni.
Jenny Malsawmtluangi hnena sum dahtute zingah hian Serchhip khawpui chhunga mite bakah, Keiṭum, Lunglei, Lawngtlai leh Aizawl lama mite pawh an tel.
Dan loa sum peipunna chungchang hi Serchhip police chuan chhuiin, mi eng emaw zat thu an zawtfiah tawh. Sum dahtute zingah police-a FIR thehlut duh erawh an awm lo.
Serchhip police-te chuan, Jenny Malsawmtluangi'n a hnena sum dahtute chu pek lêt a tiam nia sawiin, "Hei hi FIR an thehluh duh loh chhan niin a lang," an ti. Serchhip police-te hian sum dahtute hi ṭum eng emaw zat an kâwm tawh a, FIR thehlut tura an tih pawhin tu mahin an thehlut duh lo a ni.
Hetih lai hian, Serchhip police-te chuan dan hmangin Serchhip DC hnenah FIR an thehlut a, DC lamin a ṭul angin an bawhzui dawn. DC office lam hian chhui zui ṭul an ti a nih chuan chhui turin police an ruai thei.
Police-te chuan sum peipunna kalpuitu ber Jenny Malsawmtluangi bank account chu khawih chêt theih lohin an dahtir tawh a, an car leh scooter pawh an hréng a ni.
August 20, 2021-a Serchhip SP thuchhuahin a tarlan danin, Jenny Malsawmtluangi hian kum 2017 vel aṭangin sum peipunna a kalpui tawh a, thla hnih leh a chanve chhungin sum dahte chu 15% vela pungin a pe chhuak leh ṭhin.
Kumin May thla vel aṭangin Jenny Malsawmtluangi chuan mi sum dah leh a pung a pek chhuah turte a pe chhuak kim thei lo ṭan a; pawisa dah luh (capital) pawh an lak chhuah kim theih tâk loh avangin pawisa dahtute chu mangangin an buai ta a ni.