East India Summit 2021-ah CM tel

Confederation of Indian Industries (CII)-in East India Summit 2021 a buatsaih mekah nimin khan Mizoram puala hun hman niin, Mizo thilte pho chhuah a ni a, chief minister Zoramthanga'n video conference hmangin a hmanpui.

Summit-ah hian Mizorama investment tih theihna tur hrang hrang awmte târlanna video thlirho a ni a, zawhna leh chhanna hun hman a ni bawk.

CM Zoramthanga chuan, CII-in India hmarchhak state-te tan East India Summit a buatsaih chu lawmawm a tih thu sawiin, "Investment ti duhte tan Mizoramin potential tam tak a nei a, sorkar pawh a inhawng em em a ni. Mizoram economy tihhmasawnna turin kawng chi hrang hrang a awm a ni," a ti.

Mizoram chu ram la hman ṭangkai theih tur zau tak, ruahtui duhthusam, sik leh sa nuam, thei leh thlai ṭhat theihna hmun a nih thu sawiin Zoramthanga chuan, "Sector hrang hrangah hmasawnna a awm thei. State tlawhpawh harsa a nihna hi thlak danglam a, tlawhpawh awlsam taka siam theih a ni," a ti a; inkalpawhna chu ngaih pawimawh hmasak ber tur zinga mi a nih thu a sawi.

Chief secretary Lalnunmawia Chuaungo pawhin thu sawiin, Mizorama investment ti duhte chu a hmuna zir chiang turin a sáwm a, "Investor leh state mipui tana hamṭhatna turah chuan harsatna awm theite pawh sutkian dan ngaihtuahpui turin sorkar a inhawng a ni," a ti.