Voluntary Blood Donation Day

Nimin October 1 kha National Voluntary Blood Donation Day a ni a, Aizawl leh district dang ṭhenkhatah hman a ni.

Aizawlah chuan Aizawl North College-ah hman niin, Aizawl Muni­cipal Corporation mayor Lalrinenga Sailo khuallian a ni a, college zirlaite'n thisen an pe nghal.

National Voluntary Blood Dona­tion Day hi MSACS, AVBD leh Aizawl North College huaihawta hman a ni a, State Blood Tran­sfusion Council mem­ber secretary Dr Mal­sawm­tluangi Ralte-in a kaihruai.

Khuallian Aizawl Mayor chuan, thisen thlâkna a la awm lo tih sawiin, "Thisen hi kan pek a ngai. Kan Kristianna nen a inmil em em. Tlawmngaihna lantirna danglam zel mah se, thisen pek erawh hi chu a danglam mai dawn lo a, Mizo tlawmngaihna lantirna remchang ber a ni," a ti.

Lalrinenga Sailo chuan, thisen petute zawng zawng an zahawm hle tih sawiin, "Thi mai turte kan thisen pek hmanga kan chhanhim hi kan tih tur rêng a ni a, rál hmaa zâm ngai lo, ṭhian chhan thih ngam kan lantirna remchang a ni," a ti a; thisen pek kawngah AMC-in ṭangkaina an nei a nih chuan an inhawn thu a sawi.

National Voluntary Blood Donation Day-ah hian Aizawl North College chuan thisen an pe nghal a, mipa 47 leh hmeichhia parukin Aizawl Civil Hospital tan thisen unit 53 an pe a ni.

Mizoram State AIDS Control Society hnuaia Blood Transfusion Service Divi­sion chhinchhiah danin, kumin April-August chhungin Mizo­ramah thisen unit 9,168 pek a ni a, chu'ng zinga unit 7,871 chu pek bik nei loa a thlâwna pek niin, 85.85% a tling.

NVBDD 2021 pual hian Kolasib-ah chuan District Hospital Blood Bank-ah PYD (NEI) Diakkawn-te leh Kolasib College NSS leh Red Ribbon Club-te'n thisen unit 51 an pe. PYD aṭangin mipa 27 leh hmeichhia pakua, Kolasib College aṭangin mipa pakua leh hmeichhia parukte'n an pe a ni.

National Voluntary Blood Donation Day hi hriat theih chinah Lunglei, Kolasib leh Mamitah pawh hman a ni a, vawiin hian Siahaah hman a ni ang. Lungleiah chuan Association for Voluntary Blood Donation (AVBD) leh Chanmari Branch YMA buatsaihin Chanmari Hall-ah hman a ni a, an hun hmanpuitu Christian Hospital director Dr Lalramzauva chuan, medical field-ah hmasawnna leh hmanraw ṭha tak tak hmuh chhuah zel ni mah se, thisen tluka nunna chhanna atana ṭangkai a la awm lo, a ti.
Inkhawm hi Lunglei AVBD finance secretary R Lalrochama'n a kaihruai a; secretary H Lalthangliana'n report a pe bawk.

NVBDD hi kum 1975 aṭangin India ramah hman a ni ṭhin a, a thlawna thisen pek kawnga India rama hmahruaitu leh Indian Society of Blood Transfusion and Immunohaematology dintu Dr JG Jolly pian champha hriatreng nan hman a ni.