India rama ni zung chakna hmanga Tui pump-na sang ber tur enchhin

India rama ni zung (solar) chakna hmanga tui pump-na sang ber tur nia ngaih, East Bungtlang Mini Solar Based Pipe Water Supply Scheme-a solar pumping system chu nimin khan hlawhtling taka enchhin a ni.

He scheme hi Jal Jeevan Mission (JJM) hnuaia E Bungtlang khaw tana tui lakna tur a ni.

Solar pump enchhinna hun hi PHE engineer-in-chief C Lalremsiama hoa neih a ni a; C Lalremsiama chuan, single stage-a Mizorama nizung chakna hmanga tui pump-na sang ber chu metre 270 a nih thu sawiin, "Tunah metre 475-a sanga solar hmanga hlawhtling taka tui pump chhuah a ni hi a lawmawm hle," a ti.

East Bungtlang Mini Solar Based Pipe WSS hi P&V Eastern Engineers, Hunthar veng, Aizawl-in Rs. 4,45,27,267 hmangin an siam a; February 2021-ah hna thawk ṭanin, thla 16 chhunga zawh tura ruahman ni mah se, thla riat chhungin an zo hman a ni.

He scheme-ah hian mi 2,648-te chu ni tin mi pakhat tan tui litre 55 zel pek tur a ni a, ni tina mamawh zat chu litre 1,46,000 a ni. Darnam lui aṭangin tui lak niin darkar khatah tui litre 25,600 a pump chhuak thei dawn a ni.