ZPM min beihna ber chu CM dinhmun inchuh anga inpuhna a ni - Sapdanga

ZPM working president K Sapdanga chuan, pawl dangte'n ZPM an beihna ber chu chief minister dinhmun inchuh anga inpuhna a nih thu sawiin, "An peih mai mai ngawt a ni," a ti.

Nimina ZPM-in Bairabi-a mi thar lawm luhna inkhawm an buatsaihah K Sapdanga chuan, "Pawl dangte min beihna ber chu CM dinhmun inchuh anga puhna hi a ni. A chuhtua puh pawh keimah ka ni. Kum 2018-ah khan kan Val Upate'n CM candidate tur min ruatsak a, lawm takin kan pawm vek a, kan buai lo. Kum 2023 inthlanpui awm turah pawh CM candidate kan nei leh ang a, kan buai lo leh dawn," a ti a; ZPM buai se titute'n dâwt phuah chawp an thehdarh a, anmahni pawhin an ring lem lo niin a sawi.

K Sapdanga chuan, khaw hrang hrangah ZPM unit din duhte'n hmunpui lama hotute an nghak a, mahse, hripui léng avangin an duh angin an che chhuak thei lo tih a sawi a, "Kumin kum tirah khan ZPM unit din duh apiangte mahni khuaah lo inhâwr khawm a, unit lo din mai turin ngenna kan siam ta ngawt a ni. Unit 736 leh block 55 kan lo ngah ve tawh a, kan lawm hle," a ti.

Tuirial bial by-election neih tura ZPM candidate tur Laltlanmawia chu politics-ah chuan a la bangbo ve hle tih sawiin ZPM Working President chuan, "Mahse, politics-a zei em em ho hian kum 40 lai Mizoram min kaihruai tawh a, ramri pawh an chingfel thei lo a, mipui kan rálṭi tial tial a, kan rethei tial tial bawk. Politics-a zei lo ho intél khawm hian ât-huai sorkar siam kan tum a, mipuiin rem in tih phawt chuan Delhi CM Arvind Kejriwal-a thiam ang khu kan thiam ve a, a tih duh ang khu kan ti duh ve bawk," a ti a, Delhi CM tih ang tih ngei an tum thu a sawi a ni.