ASF vangin vawk 28,769 a thi tawh

Vawk pùl hri, African Swine Fever (ASF) avangin nimin thleng khan Mizoramah vawk 28,769 a thi tawh a, khua/veng 269-ah ASF a léng tih finfiah a ni tawh.

Nimin khan ASF hri kai vawk 49 a thi a, vawk pahnih tihhlum (suat) a ni. ASF lènna nia rinhlelh khua/veng pathumah vawk pali a thi bawk.

Animal Husbandry & Veterinary department-in report an dawn chinah, nimin thleng khan ASF infected area-a vawk 10,150 suat a ni tawh a, ASF lênna nia rinhlelh khua/veng pasarihah vawk 190 suat tawh nen a vaia Mizorama vawk suat tawh chu 10,340 a ni.

ASF vangin Mizoramah vawk 28,769 a thih tawh laiin, ASF lènnaahte vawk dam lai 47,923 a la awm a; nimin thleng khan ASF infected area-a puan ni lo khua/veng 91-ah chhan hriat loa vawk thi 490 a awm bawk.

Aizawl district chu ASF infected area leh ASF vanga vawk thi tamna ber a la ni zel a, Mizoram puma infected area zinga 41.63% leh vawk thi zawng zawng zinga 41.81% chu Aizawl district-a mi a ni. Serchhip district chu ASF vanga vawk suat tamna ber a ni a, Serchhip district-a ASF infected area 35 zinga 29-ah nimin thleng khan vawk 3,007 suat a ni tawh.

Serchhip district-a Thenzawl khua chu Mizorama ASF vanga vawk thi tamna ber a ni bawk a, nimin thleng khan Thenzawl khuaa vawk 921 chu ASF vangin a thi tawh. Mamit district-a Léngte khua chu ASF vanga vawk suat tamna ber a ni thung a, vawk 2,033 suat tawh niin, hei hi Mizoram puma vawk suat tawh zat 10,340 aṭangin 19.66% a tling.

Chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin AH&Vety department chuan mipui an ngen a ni.