Covid-19 vangin mi 313 an thi tawh

Nimin khan tlai dar 5 thlengin Covid-19 vangin mi pathum an thi a, September 30, Ningani khan zan lamah mi pakhat a thi bawk. Sorkar chhinchhiah angin, nimin tlai dar 5 thleng khan Mizoramah Covid-19 vangin mi 313 an thi tawh.

September 30, Ningani zana hripui vanga thi chu P Vanlalruata (52), Hunthar Veng a ni a, zan dar 10:15-ah State Referral Hospital-ah a thi. Covid-19 vei a ni tih September 15 khan hriat chhuah a ni a, September 18 aṭangin SRH-ah enkawl a ni.

Bawihchhungi (90), Tuikual North chu nimin zing dar 4:20 an inah a thi a, natna dang nei sa a ni. Nimin zing khawvar hmain RAT hmangin a sample endik niin, Covid-19 positive a ni tih finfiah a ni a, SRH-ZMC lama hruai tum a nih mek laiin a thi a ni.

Covid-19 vei enkawl lai Ngulsangvela (64), Ramhlun North pawh nimin tlai dar 3:15 khan SRH-ZMC-ah a thi a; Covid-19 vei a ni tih September 14-ah hmuh chhuah niin, September 18 khan SRH-ah dah luh a ni a, natna dang nei tel a nih thu sorkar thuchhuakin a tarlang.

Nimin tlai dar 3:30 khan C Lalruata (67), Hrangchalkawn, Lunglei pawh hripui vangin Lungleia DCHC-ah a thi. Covid-19 positive a ni tih September 16-ah hmuh chhuah a ni a, September 18 khan DCHC-ah dah luh a ni.