Covid-19 donaah hmalak dan her hret a ṭul - Health Minister

Health minister Dr R Lalthangliana leh Home minister Lalchamliana te hoin nimin khan sorkar, kohhran leh pawl ṭhenkhat hruaitute'n Secretariat conference hall-ah Mizorama Covid-19 dinhmun an sawiho. Health Minister chuan, Covid-19 donaah inthlahdah si loa hmalak dan her hret a ṭula a lan thu a sawi.

Ṭhutkhawmah hian sorkarin Covid-19 donaa hma thar lak dan tur ngaihtuah tura a din Expert Committee on COVID-19 Management rawtna thlirho a ni a; rawtna an thlen zingah Mizoram páwn aṭanga rawn lutte khuahkhirh dan hman lai mek siamṭhat te, swab sample endik dan thar ruahman te, home isolation inkaihhruaina siamṭhatte a tel.

Natna benvawn neite leh kum upate fimkhurpuina tur te, containment zone puan dan kalphung thlak te, damlo na zualte damdawi pek dan tur inkaihhruaina te, Covid-19 testing kiosk siam belh chungchang leh sûlhnu chhui dana kalphung tihdanglam rawtnate a awm bawk.

Dr R Lalthangliana chuan, Covid-19 donaah inthlahdah si loa hmalak dan her hret a ṭula a lan thu sawiin, "Hemi atana expert team-te'n uluk taka ngaihtuahna an séng hi a lawmawm. Mizoram dinhmun mek thlir chungin kan hmalakna thar turah mipui leh tlawmngai pawlte bakah, kohhrante pawhin ṭha taka min thlàwp ngei kan beisei a ni," a ti.

Meeting-ah hian, State Referral Hospital-a ICU siam belh chu kar lehah hawn theih tura peih tum a nih thu te, district hospital parukah paediatric ICU dah a, damdawi-in tinah ICU khum pali leh HDU khum pariat zel dah tura ruahman a nih thute an tarlang.