Covid-19: September 2021 dinhmun Positive 34,831; chhuak 27,934; thi 93

Kumin September thla chhung khan Mizoramah Covid-19 vei mi 34,831 hmuh chhuah a ni a, hripui vei hmuh tam ber thla a ni. Hemi chhung vek hian hripui vei dam tawh mi 27,934 chhuahtir an ni a, mi 93 an thi thung.

IDSP chhinchhiah lan danin, September hma lama Covid-19 positive hmuh tam ber thla chu August 2021 khan niin, 21,073 hmuh chhuah a ni a, hei hi September thla chhunga hmuh zat 34,831 chuan 13,758-in a khûm. Swab sample 2,31,281 endik a ni a, September thla chhunga positive percentage chu 15.06% a ni.

September thla chhungin hripui vei dam tawh mi 27,934 chhuahtir an ni a, chawhrualin ni khatah mi 931.13 chhuahtir an awm zel ang a ni. Thla liam ta chhung khan dam tawh chhuahtir aiin hripui vei hmuh thar 6,896-in an tam zawk. Chhuahtir an tam ber ní - ni 26 leh ni 30-ah mi 1,592 ve ve an chhuak.

September thlaa ni 30 zinga ni 23-ah hripui vei mi sang khat aia tam hmuh chhuah a ni a, mi sang khat hmuh tlin loh ní ṭum sarih awmin, chu'ng zinga ni li chu Pathianni, ZMC laboratory-a swab sample endik loh ní a nih bakah, hmanraw dang pawha endik tlem ní a ni.

Hripui vei hmuh chhuah tam ber ni chu September 27 niin, mi 1,846 hmuh a ni a, a dawttu chu September 29 niin, mi 1,741 hmuh chhuah a ni. Hmuh chhuah tlem ber ní September 5-ah mi 444 hmuh a ni thung.

September 2021 chhung vek hian Covid-19 vangin 93 an thi a, thi an tam ber thla a nih bakah, ni tin mitthi an awm. Thi an tam ber ni chu September 23 niin, mi 11 an thi a, a dawttu Sept. 27-ah mi pasarih an thi. A hmaa thi tam ber thla chu August 2021 niin, mi 69 an thi a, August thlaa thi aia September thlaa thi an tam zawkna chu 24 a ni.