COVID-19: Mizoram dinhmun ; Hripui vei 1,170 hmuh belh a ni

September 30, Ningani khan Mizoramah Covid-19 vei mi 1,170 hmuh chhuah a ni a, September thla chhung zawnga hmuh zat chu mi 34,831 an ni.

Nimin khan hripui vei dam tawh mi 729 chhuahtir an ni a, hripui vangin mi pathum an thi.

Covid-19 vei Ningania hmuh tharte chu mipa 501 leh hmeichhia 669 an ni a; ZMC laboratory-a hmuh chhuah 289, TrueNAT hmanga hmuh 59, RAT hmanga hmuh 799 leh Fluorescent Immu­noassay (FIA) hmanga hmuh chhuah 23 an ni.

IDSP record angin, Mizoramah Covid-19 vei 94,830 hmuh chhuah a ni tawh a, mipa 46,862 leh hmeichhia 47,968 an ni. Nimin tlai dar 5 thleng khan mi 78,833 (83.13%) chhuahtir an ni tawh a, mi 313 (0.33%) thi tawhin, enkawl mek mi 15,684 (16.54%) an awm.

September 30, Ningania Covid-19 vei hmuh thar mi 1,170-te chu symptom nei 598 leh nei lo 572 an ni a; tualchhunga kái mi 1,169 leh tun hnaia state pawn aṭanga rawn lut mi pakhat niin, tualchhunga kái zingah hri kàina chin hriat loh 523 an awm.

Kumin September thla chhungin hripui vei mi 34,831 hmuh chhuah a ni tawh a, chawhrualin ni tin mi 1,161.03 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 94,830 chu mi 1,000 zelah hripui vei mi 86 an awm ang a ni a; mi 1,00,000 zela Covid-19 vangin mi 28 an thi tawh ang a ni.

Nimin khan tlai dar 5 thlengin hripui vei dam tawh mi 729 chhuahtir an ni a; Aizawl district-ah mi 528, Lawngtlai district-ah 68, Mamit district-ah 40, Kolasib district-ah 34, Serchhip district-ah 30, Hnahthial district-ah 14, Champhai district-ah pasarih, Lunglei district-ah panga leh Khawzawl district-ah mi pathum an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh 94,830 zinga mi 90,316 chu Mizoram chhunga kái chhâwng an ni a, mi 4,514 chu Mizoram páwn aṭanga an rawn luh hnua hmuh chhuah an ni.

Covid-19 positive hmuh tawh 94,830 zinga mi 93,196 chu civil mi an ni a; BSF mi 736, Assam Rifles-a mi 339, CRPF-a mi 122, BRO/BRTF-a mi 156, sipai (army) 64, National Disaster Response Force-a mi 32 leh truck enkawltu mi 185 an awm bawk.