BSI Aizawl Auxiliary Jubilee Ride

Bible Society of India (BSI) Aizawl Auxiliary kum 40 tlin, ruby jubilee lawm nan BSI Aizawl Auxiliary hnuaia Youth Committee chuan nimin khan Aizawlah two wheeler Jubilee Ride an huaihawt a, mi ṭhahnem tak an tel.

BSI Aizawl Auxiliary Ruby Jubilee Ride hi Millennium Centre-ah ṭan a ni a, inkhawm tawi neih a nih hnuah Aizawl chhim lam panin an tlân. BSI-a tel kohhran pawl hrang hrang - Presbyterian, Baptist, Salvation Army, Seventhday Adventist, UPC (NEI) ṭhalaite an tel. Saikhamakâwn, Melthum kâwn, Hlimen kâwn leh Samthang khuaahte inkhâwm tawi an hman hnuah Samthangah tàwp­na hun an hmang a ni.

A ṭanna, Millennium Centre-ah BSI Aizawl Auxiliary secretary Upa Thangnghilhlova'n thu­chah tawi a sawi a; Saikhamakawnah T Van­lalnghakliana, Mel­thum­ah Upa Samuel Laldingliana, Hlimenah Upa Lalmalsawma leh Samtlangah PC Lalhming­mawia ten thuchah tawi an sawi thung. Inkhawm tawi neihna apiangah hian Besy Choir-in hla an rem zel bawk.

Bible Society of India hi December 8, 1957-ah Lungleiah Lunglei Branch tiin din a ni a, December 11, 1957-ah Dawrpui Presbyterian Kohhran biak-inah Aizawl Branch din leh a ni. June 1, 1978-ah Ai­zawl chu Assiciate Auxi­liary-ah hlan kai niin, February 25, 1983-ah Auxiliary puitlingah hlan kai a ni a; Associate Auxiliary-a hlan kai ni, June 1 chu BSI Aizawl Auxiliary din ni-ah pawm a ni ta a ni.

BSI Aizawl Auxiliary ruby jubilee lawmna pui ber chu June 1-3, 2018 chhungin Mission Veng Kohhran biak-inah neih a ni ang.