Cheng nuai 1267.21 hmangin Kawng pêngṭhuam 10 zauh tum

Mizoram sorkar chuan New Eco­nomic Development Policy (NEDP) hnuaiah cheng nuai 1267.21 hmangin kum hnih chhungin Aizawla kawng pêngṭhuam 10 siam a tum zinga ṭhenkhat a siam zo tawh. Hei hi NEDP-a 'Improvement of Urban Mobility in Aizawl City' aṭanga thawh a ni a, project hmingah 'Aizawl City Junctions Improvement' tih a ni.

Aizawla kawng péngṭhuam 10 zauh hna thawhna atan hian a kaihhnawih department - UDPA, PWD, PHE, P&E, BSNL, AMC, SIPMIU, DC Office leh Geology & Mineral Resources depart­ment-te'n February 22, 2018 khan Work Coordination Committee on Junction Improvement an din.

UDPA department hotute sawi danin, Aizawla kawng pêngṭhuam 10 zauh tura hma an lakte chu NEDP sum hmanga thawh a ni a; kum 2016-17 chhung khan kawng pêngṭhuam pali-ah hmalak tum niin, nuai 650 ruahman a ni. A kaihnawih department-te'n estimate an siam hnuah cheng nuai 767.21 ruahman a nih tâk avangin Bawngkawn, Millennium Centre leh Republic Veng pênna Pi Pangi Pêngte chu kum 2016-17 chhung bikah khawih phawt ni se, an ti.

Project 10 zingah, Vaivakawn-Hun­thar péngṭhuam chu sorkar kum thar (2017-18) chhunga thawh atan an dah a; Millennium Centre junction chu transformer a awm vang te, kawng tihsan a ngaih nasat dawn avang te, kawng thlang lam dawr neituteah harsat­na a awm theih dawn avangin khawih a remchang lo a, a thawhna tur sum chu sorkarin a phalsak angin Vaivakawn-Hunthar atan hman a ni.

Vaivakawn-Hunthar junction siam hna chu thawh tum a nih laiin Hunthar Venga leimin a awm avangin DC office-a District Disaster Management Authority-in ṭhulh rih turin an ti a; DC Office-in khawih an phalsak hnuah, GST hman a nih avang leh chhan dang vangin estimate cheng nuai 117.21 chu nuai 142.20-ah tihsan a ni a, tunah thawh zawh a ni tawh. Bawngkawn aṭanga Sairang kawng NH-54 kawng péngṭhuam zauhna atana sum ruahman 272.50 pawh ennawn niin, 283.64-ah tihsan a ni.

Kum 2016-17 chhunga sum ruahman hmangin kawng péngṭhuam pathum khawih a ni a, zawh thawkhat vek tawh niin, permanent work tlem la awm khawih mek a ni a, zawh theih thuai beisei a ni. Kum 2017-18 ah chuan kawng pêngṭhuam pasarih siam tura tih a ni a, kum 2017-18 atana sum dah hmangin Dawr­pui Vengthara Dinthar pênna siam mek a ni. Kum 2017-18 chhunga kawng pengṭhuam zauh hna thawh turte chu a zawh hun tur siam a ni lo a, a theih ang anga thawh zel tur a nih thu UDPA hotute chuan an sawi.