District Re-Organisation Committee-in 17.7.2017-a Report a thehluh sorkarin a ngaihtuah mek

Mizorama district ṭhen leh district ramri chungchang ngaihtuah tura Mizoram sorkar­in a din, District Re-Organisation Committee chuan July 17, 2017-ah sorkarah report an thehlut tawh a, chu chu sorkarin a ngaihtuah mek nia thudawn a ni.

District re-Organisation Committee hi GAD notification hmangin June 16, 2016-ah din a ni. Saitual, Hnahthial leh Khawzawl district puan tawhte implement loin, sub-diviion office-te thuam ṭhat zawk tum a nih leh nih loh zawhna chu, "Mizoram sorkarin District Re-Organisation 1998-a a kalpui khan, district thar panga leh civil sub-divition 13 a siam thar a. Chung district pangate chu sorkarin a theih ang tawkin tihchangtlun hna thawkin, officer leh staff leh mamawh dangte a ngaihtuahsak a. Tunah chuan district pangate hi district mumal anga function thei turin thuam chhoh an ni," tia chhan a ni.

GAD hotute chuan civil sub-division awm sa leh a tharte chu sorkarin mumal taka thuam hlei theih lohin tun thlengin a la awm tih tarlangin, "Building, staff, motor, etc. te an nei changtlung lo hle a, mumal taka tun thlengin thuam an la ni lo," an ti a, tunah chuan district pangate function thei tura sorkarin hma a lak hnuah civil sub-division-te thuam ṭhat hna chu sorkar hmachhawp pawimawh tak a nih an tarlang.

NEDP hnuaiah 'Scheme for Upgradation of Administrative Infrastructures' duan chhuah a nih thu sawiin GAD hotute chuan "He scheme aṭang hian kum 2917-18 atan cheng nuai 1,500 dah a ni. Heta ṭang hian district leh civil sub-division-te infrastructure mamawh eng emaw zat tihchangtlun tura hmalak a ni ang. Delegation of functions leh staffing-te hi mumal zawka kal chhohpui tura ruahman a ni a, hemi hmalaknaah hian Saitual, Hnahthial leh Khawzawl pawh an tel a ni," an ti.

Hnahthial, Khawzawl leh Saitual-te September 12, 2008-a district atana puan tawh, tun thlenga tihpuitlin a la nih loh chhan zawhna chu, "District thar implement chung­chang hi sorkarin a ngaihtuah mek a ni," an ti.