Chief Secretary-in Lunglei a tlawh

Mizoram chhim lam district tlawha zin chief secretary Arvind Ray chuan Pathianni khan Lunglei a tlawh a, Lung­lei additional DC Benjamin Lalzama hoin sorkar official-te'n lo an dawngsawng a, Circuit House-ah an inkâwm.

Arvind Ray chuan, Lunglei district-a sor­kar hna kalpui a nih dan leh hmasawnna ruhrel project-te tlawh tura Lunglei hi tlawh a nih thu sawiin, "Dan leh thupek kenkawh kawnga harsatna lian tham awm loin boruak rálmuang tak hnuaia sorkar hmalaknate kalpui a ni," a ti a; district hmasawn zelna atan zirna leh hriselna a pawimawh hmasak thu a sawi.

Chief Secretary chuan, Lunglei district mipui hriselna dinhmun te, damdawi-ina khawl awm te, faina kawnga hmalakna te, zirna lam dinhmun te, kawlphetha leh tui supply dinhmun tlangpui­te official-te a sawipui.

Lunglei district-a sorkar hotute chuan an hmalakna tlangpui an sawifiah a, hna an thawh kawnga harsatna an tawhte Chief Secretary an lo hrilh.

Chief Secretary hian Pathianni vêk khan Lung­lei district-a hmasawnna hna kal mek pahnih - Lena Stadium, Serkawn leh State Sports Academy, Zobawka siam mekte a hmunah a enfiah a; sor­karin hmasawnna ruhrel a siamte chu duat tak leh neitu rilru pu chunga mipuite'n an enkawl a ṭul thu a sawi.