Rei lo tê damna tur nachhâwkna peah MNF Vice President-in Congress a puh

Tuirial East Block MNF chuan nimin khan Lungdai YMA Hall-ah SEDP & Political Training an buatsaih a; MNF vice president Dr R Lalthangliana'n hmanpuiin, "Congress sorkarin an thiam ve riau chu, rei lo tê damna tur na­chhâwkna an pe zeuh ṭhin hi a ni," a ti.

Dr R Lalthangliana chuan, "Congress sorkar kum tam tak chhungin kawngpui ṭha min pek theih loh laiin, inthlan dawnah rei lo tê chauh daih turin kawngpui an tidum a. Inthlan dawn kumah chuan rei lo tê na­chhawkna pek zawk che u an tum a, NLUP nachhâwkna te, NEDP na­chhâwknate pawh an la rawn ti zel a ni," a ti a; chu'ngte chu Congress sorkar nghakuaia chaw chah a nih thu a sawi.

Congress party chawchah - NLUP, NEDP leh 7th. Pay-te chu dawng zel tura mipui a chah rualin R Lalthangliana chuan, "Pawisate hi Pu Hawla pawisa a ni lo, Bhavan Congress pawisa a ni lo, mipuite pawisa a ni. Pawisate chu Congress pawisa emaw kan tih avangin a nghakuai thlenga ei kan tum ṭhin. Tunah chuan a chaw chah chauh in ei ang a, a nghakuai lai tak erawh chu a zumin a chhun dawn che u avangin ei tel suh u. Tumah phih awh theihin awm lo ang che u," a ti.

MNF Vice President chuan, Congress party chu sorkar an inbeisei tawh lo nia sawiin, "Zu an zuar a, an zawrh dawnah tumah kan ráwn lo ang an tih ang ngeiin NGO leh kohhran an ráwn lo. Zu hmangin hmeithai leh fahrah siamna khawl an din a, police ringawt 400 chuang an thi tawh a, zu vanga ṭhalai thi hi 2,000-3,000 vel an tling tawh," a ti a; MNF chuan hmeithai leh fahrah siamna khawlpui chu an titàwp dawn niin a sawi.

Dr R Lalthangliana chuan, MLA biala MNF chhiatna ber chu CADC area a nih thu sawiin, "Kan han chhe lailéng khawp a, kum 2014-a UDF hminga Pu Robert Romawia Royte MP-a a din khan, Mizoram hmun hrang hranga kan chak em em laiin saw lai bialah sawn vote 8,000 chuangin kan chak lo. Chutiang a nih laiin, tun ṭumah CADC MDC inthlanah seat pariat kan la a, Congress-in seat paruk an la a ni," a ti a; Mizorama MNF chhiatna ber ṭhin bialah MDC an neih tam ber theih chuan, Mizoram pumah MNF an sorkar dawn tih a chiang niin a sawi bawk.