Zawlnuamah ILP nei lo hnam dang man
Zawlnuam police-te leh MZP headquarters, Zawlnuam-te chuan nimin khan Zawlnuam khaw chhunga hnam dang awmte an enfiah a, Inner Line Permit (ILP) nei lo hnam dang (vai) eng emaw zat an hmu chhuak.
Zawlnuam MZP tarlan danin, Zawlnuam police leh MZP-te hian an khuaa hnam dang mi 84 an enfiah a, ILP nei lo mi 18, ILP thi tawh mi 10 an man chhuak a ni. ILP nei lo leh thi tawh hnam dangte chu an vaiin Zawlnuam police-in an khawm nghal.
Zawlnuam MZP chuan, dan loa Zawlnuama hnam dang awmte enfiah hna an kalpui chhunzawm zel dawn tih sawiin, an hmalakna turah khawtlang mipuite ṭawiawmna an ngen a ni.
Zawlnuam Police Outpost-a officer in-charge (OC) Vungzamuana chu February 12, 2018-ah sawn chhuah a ni a, chumi hnuah Zawlnuam Outpost-ah OC mawhphurhna la thei tur an la awm leh lo nia sawiin Zawlnuam MZP chuan, "Zawlnuam hi khaw lian leh inter state boundary-a awm, hmun pawimawh tak a nih piah lamah, Zawlnuam police jurisdiction hi a zau em em a, pawi khawihna chi hrang hrang thlen tamna hmun a nih avangin a rang thei ang bera OC charge la thei tur dah tur in sorkar kan ngen a ni," an ti.
Zawlnuam MZP-te hian Zawlnuam Police Outpost chu police station puitlinga hlangkai turin Mizoram sorkar an ngen bawk.