KHAWTHLIR

4%-ah tisang
Person with Disabilities (PwD) commisioner Dr Lalnunthara hnen aṭanga thu dawn danin, Department of Administrative & Personnel Reforms (DPAR) chuan tun hnai khan notification a tichhuak a, sorkar hna ruak hrang hranga rualbanlote tana hauh zat, 3% ni ṭhin chu 4%-ah tihsan a nih thu a tarlang.

Orientation camp
Salvation Army Territorial headquarters chuan nimin khan India Eastern Territory chhunga reserved officer leh senior reserved officer-te tan Booth Mension conference hall-ah orientation camp an buatsaih a, territorial commander Comr. Lalzamlova'n a hmanpui. Orientation camp-ah hian reserved ofifcer leh senior reserved officer-te hi an mawhphurhna hrang hrang zirtir an ni.

Thisen pe
Chawnpui Branch KṬP chuan an branch kum 60 tlin, diamond jubilee lawm nan nimin khan Synod Hospital tan thisen unit 39 an pe a, a petute mipa 33 leh hmeichhia paruk an ni.

Bial mi duh
Hachhek Constituency Development Committee (HCDC) leh Hachhek huam chhunga welfare leh zirlai pawlte chuan MZP conference hall, Aizawlah joint meeting an nei a, political party tin president-te hnena ngenna an lo thlen tawh angin, MLA election lo awm turah an bial huam chhung mi ngei leh Zohnahthlak ngei candidate dah turin party tin thuneitute an ngen nawn.

Operation Jericho
Tuikual South Branch YMA chuan kumpuan 'Ram leh hnam humhalh' tih bawhzuiin Zodin Square, Vanapa Hall bul vel, Treasury Square leh Mizoram Legislative Assembly building chhehvelah 'Operation Jericho' neiin mi awm tha duh lo thenfai hna an thawk ṭhin a, April 24 aṭanga khan mi awm ṭha duh lo 91 an khawm a, thu ṭha an hrilh bakah an veng chhung tibawlhhlawh tawh lo turin an ngen ṭhin.