Eptu in thlan chuan, 'Kan tihfuh loh pawl tak,' Inti ngei ngei ang - MNF President

MNF chuan October 2, Inrinni khan October 30, 2021-a Tuirial bial MLA by-election lo awm tur atan Lungdai, Kawnpui leh Thingdawlah campaign bulṭanna hun an buatsaih a; Kawnpui leh Thingdawla thusawitu MNF president Zoramthanga chuan Tuirial bial mipuite chuan eptu lam candidate an thlan tlin chuan kan tihfuh loh pawl tak an tih ngei ngei tur thu a sawi.

Zoramthanga chuan khawtlang hruaitu leh neutral-te chu ngaihtuahna fim tak hmang tura chahin, "Ruling MLA neih nge eptu MLA neih, Aizawl West-I leh Serchhip zawt ula chuta ṭang chuan ngaihdan in nei thiam ang. Kum hnih chuang sorkarna la chelh tur candidate thlang tling rawh u. Eptu in thlan chuan Serchhip angin in reh vang vang anga, 'Kan tihfuh loh pawl tak,' in ti ngei ngei ang," a ti.

ZPM leh Congress party candidate-te pawh an ṭhat tho tur thu sawiin MNF President chuan, "Kan sawisel lo. Mah se, sorkara a hlawkna telpui thei tur che u MNF candidate hi lo thlanna chang in lo hriat a ṭha a ni," a ti a; Tuirial bialah hmasawnna a inṭan dawn chauh avangin ruling MLA neih an ṭangkaipui tur thu a sawi.

MNF President chuan Congress chungchang sawiin, "An vanglai chuan Delhi leh Mizoramah an lal hle, an tlak chhiat hun a lo thleng a, at-nain a bawm a, an tlachhe ta em em a ni. An hun a tawp tawh a, anmahni ngei pawh an beidawng tawh a ni. Serchhip bial by-election ah, CM Pu Hawla'n kum 10 tel a bulum puia a lo ṭhutchilh tawhna hmunah an party candidate khan dahkham a chawi a nih kha," a ti.

ZPM chungchang sawiin Zoramthanga chuan, "ZPM pawh hian 'enchhin' tih an sawi reng a, an hotupa Pu Duhoma pawh kum 35 chuang politics-ah a lo awm tawhin, Congress president-te pawh a lo ni tawh a ni. Mipuiin enchhin an la tum ngai reng reng lo," a ti a, kawngpui kama zuang thing itawm tak ding zuah, thing tuah leh thing zai atana hman tlak loh ang vel a nih thu a sawi.

Zoramthanga chuan Covid-19 avangin kum kaltaah khan sorkar laipui aṭanga pawisa hmuh ṭhin cheng vbc. 3000 zet hmuh a nih loh thu sawiin, "Kum dang aiin state tinin kan hmu tlem a ni. Mizoramah chuan mihringah mai ni tawh loin vawk pul hri thlengin a leng a, ramri a buai a, ram a kangin, Myanmar raltlan an lo lut a ni," tiin sorkar harsatna tawhte a sawi.

Harsatna hrang hrang karah Pathian ṭanpuinain sorkar hnathawk hlawh pe theiin, gas, buhfaiah harsatna awm loin, kawng chhia tam tak an thuamṭhat thu sawiin MNF President chuan, "India leh khawvelah Covid-19 a hniam zel a, Mizoramah erawh kan la sang rih deuh a, a ziaawm chhoh ve zel kan beisei," a ti a, sorkar kumtharah chuan SEDP-ah a theih chin china hmalak an tum thu a sawi.

Lungdaia thusawitu MNF sr. vice president Tawnluia chuan, "He bial tana theihtawp chhuaha ṭhahnemngai taka lo enkawl ṭhintu Pu Andrew H Thangliana'n a boralsan ta hi kan ui takzet a, a chhungte leh a awmna party thinlung takin kan tuarpui a ni. ECI-in inthlan hun a rawn puan hnuaah kan party pawhin he lai bial mipuite tana ṭha ber tur kan rawn thehchhuak a ni," a ti.

MNF candidate K Laldawngliana chuan Pathianin Tuirial biala ding tura a koh chhuah thu sawiin, "Pathian bak rinchhan tur ka nei lo. Pathian chakna leh in zarah thlan tlin ngei ka nih ka beisei tlat. Kan campaign naah pawh Krista hmel an hmuh theihna atan fimkhur taka campaign turin ka inbuatsaih," a ti.

MLA fund chauhin hma a lak tak tak theih loh thu sawiin K Laldawngliana chuan, "Rorellai, chak taka hma la a, ke pen mek nen thawkho thei tur ka nih avangin remchang berah ka in ngai," a ti a, Andrew H Thangliana sulhnu leh hmathlirte bawhzui leh tipuitling tura chak taka hma a lak theihna atan thlang tling ngei turin Tuirial bial mipuite a sawm.

MNF thuchhuah tarlan danin campaign bulṭanna puala inkhawmah hian Kawnpuiah mi 186 leh Lungdaiah mi 201 an party-ah lawmluh thar an ni.