Dy. CM-in Faina Hapta a hawng

Inrinni khan Mizoram hmun hrang hrangah Swachh Bharat Mission kum 7 tlin lawmna, Faina Hapta vawi 45-na leh Mizoram Fai Inelna vawi 5-na hawn a ni a, Aizawlah chuan UDPA changtu dy. chief minister Tawnluia'n a hawng.

Dy. Chief Minister chuan kumin faina hapta thupui atan 'faina - kan in leh a chhehvel aṭangin' tih a nih angin faina hi mimal leh chhungkua aṭanga ṭan tur a nih thu sawiin, "Sorkar, khawtlang hruaitu, tlawmngai pawlte leh media-te'n fai leh thianghlim kawnga zirtirna an au chhuahpui a ṭul a; faina hi mimal leh chhungkuate nen kan zavaia kan mawhphurhna inṭawm a ni," a ti.

Dy. CM hian Mizoram Cleanliness Competition 2021 guidelines, IEC merchandise leh Cleanliness Week Media Campaign a tlangzarh nghal a ni. UDPA director H Lianzela tarlan danin, Mizoram chhunga village council leh local council zawng zawng tan SBM Local Ambassador mi 241 appointment tihchhuah a ni a, heng mite hi faina lama sulsutu an ni dawn a ni.

Inkhawmah hian sanitation worker thawk ṭha ber mipa leh hmeichhia thlan­chhuah Rinawma leh Lalbiakmawii hnenah Best Sanitation Worker chawimawina hlan a ni. Prime Minister chuan October 1 khan Swachh Bharat Mission II a hawng a, India ram pum huap faina endikna people first tih thupui hmanga neih tur Swachh Suvekshan, 2022 chu September 27, 2021 khan hawn a lo ni tawh.

UDPA chuan Inrinni aṭangin Mizorama khawpui 28-ah faina beihpui hi an thlak ṭan a, Mizoram khawpui fai intihsiakna ‘Mizoram Cleanliness Competition vawi 5-na’ kalpui a ni zui nghal dawn a ni.