Champhai NGO-in October chhungin RT-PCR bun fel hman ngei an beisei

Champhai NGO hrang hrangte chuan Champhai District Hospital-ah Oct, 2021 chhung ngeia RT-PCR khawl Mizoram sorkarin a bun fel theih an beisei.

Champhai Sub. Hqrs. YMA president F Lalrin­muana kaihhruaia NGO hrang hrangte October 2-a ṭhukhawm chuan an district-in RT-PCR khawl an neih theihna atana Mizoram sorkar leh an district huam chhunga MLA-te hmalakna lawmawm an tih thu sawiin, "Tun dinhmuna kan district-a hri kai pun chak dan leh hri len dan thlirin, RT-PCR khawl hi a rang thei ang bera bun fel vat a ṭulin kan hria. RT-PCR khawl hi Champhai District Hospital campus-a building awm saah tun thla chhung ngeia min bunfel sak turin sorkar kan beisei," an ti.

Champhai NGO-te chuan Champhai District Hospital-a TrueNat khawl pahnih awm mek, quatro khawl chuan extractor pali a hman theih laiin, a tir aṭangin extractor pahnih chauh a chhawm tih tarlangin, "Hei hian TreuNAT hmanga sample endik a ti chak thei lo a ni," an ti a, a rang lama extractor pahnih ngaihtuahsak turin thuneitute an ngen.