Lalduhoma'n a bial mipuite tan Swab sample endikna a pe

Serchhip bialtu MLA Lalduhoma chuan Inrinni khan Sechhip District Hospital leh Thenzawl Community Health Centre tan swab sample test-na khawl 'Standard F200 FIA Analyser' leh a test kit eng emaw zat a pe.

Lalduhoma chuan India ramah Mizoram chu Covid-19 hluarna ber a lo nih chhoh tak avangin sorkar laipui pawh a lu a hai thu sawiin, "A chhan rawn zirchiang turin mithiam rawn tirh chhoh hial an tum a ni. Serchhip bial tan nikum kumtir lamah RT-PCR khawl pek ka lo tum tawh a, hotute'n ngai an tih loh avangin ka pe ta lo a ni," a ti.

Covid-19 kai leh kai loh test tura thui tak tak intlar a ngai ṭhin leh sample test result ṭhenkhat nghah rei a ngai ṭhin lutukte chu an harsatna tawh lian tak pakhat anih thusawiin Lalduhoma chuan "Standard F200 FIA Analyser hmangin dik zawk leh rang zawkin sample an endik zung zung thei tawh dawn a ni," a ti a, bial mipuite chu hri dona atana an mamawhte a hnena thlen zel turin a chah.