Health Minister-in ICU thar a hawng

Health minister Dr R Lalthangliana chuan October 2, Inrinni khan Civil Hospital, Aizawl-ah khum 10 awmna medical intensive care unit (ICU) ward thar a hawng.

Dr R Lalthangliana chuan ICU chu din a hautak tih sawiin, "Senso a turu em em mai a, ken tel a ngahin thawktu tur pawh a duh tam a, heng zawng zawngah hian hriatthiamna neia nasa taka ṭhahnem min ngaihpuitu Chief Minister, Finance Minister ni bawk Pu Zoramthanga chungah Health department aiawhin lawmthu ka sawi," a ti a; Civil Hospital, Aizawl chu Mizoram hmun hrang hrang aṭanga damlote pan ṭhin a nih thu leh khum 10 awmna ICU ward dang pawh rei loteah peihfel a nih dawn thu a sawi.

ICU-a thawk tur specialist doctor an mamawh ang lak tur an vang ṭhin tih sawiin Minister chuan,"Hei hian rilru a kal thui ir ṭhin hle. Mizo ṭhalai lehkhathiam tak takte'n hei hi chonaah ngai se ka duh," a ti a, Mizoram tan thiamna zir kawnga ke pen nasa lehzual turin ṭhalaite a chah.

Health Minister chuan Civil Hospital, Aizawlah hun rei tak khum panga awmna ICU a awm thu sawiin,"Tunah hian 15 a ni ta a, rei loteah medical ICU khum 10 dang kan peih fel bakah Pediatric ICU khum pali leh Obstetric ICU khum pali awmna peih fel a ni dawn bawk a, heng zawng zawng peih fel a nih hunah chuan ICU khum 33 a awm tawh dawn a ni," a ti.

SRH-ZMC a khum 34 awmna ICU-ah khum 20 dang dah belh tura hmalak mek a nih thu te, ICU ward thara thawk tur nurse 50 lak mek a nih thu te, staff dang lak tawh sate pawh training pek vek a nih thu te, tun karah hian khum eng emaw zat chu hman ṭan theih an beisei thu te, Civil Hospital, Aizawlah Magnetic Resonance Imaging (MRI) bun tura hma lak mek a nih thute lehCivil Hospital ram chhunga medical quarters sak tur bawhzui mek a nih thute a sawi bawk.

Sorkar thuchhuah tarlan danin, kum 2007 khan Civil Hospital, Aizawlah hian khum pathum awmna ICU neih ṭan a ni a, kum 2012-ah khum pahnih dah belh a ni. Tuna khum 10 dah belh nen hian a vaiin khum 15 a awm mek a ni. ICU-a thawk tur doctor panga, nurse 25 leh IV-grade 10 lak fel a ni tawh.

ICU hawnna inkhawmah hian Health & Family Welfare Board vice chairman Dr ZR Thiamsanga, MLA, Health secretary R Lalramnghaka, DHME director Dr T Lalhmangaihi, Health Principal director Dr F Lallianhlira, Civil Hospital medical superintendent Dr Lalhmuchhuaka bakah, Civil Hospital-a doctor thawk pension tawh te, Aizawl City Local Council Association, Dawrpui Local Council leh Non-Government Hospital Association of Mizoram aiawhte an tel.