Sorkar-in RT-PCR a buaipui thar thut hian mipui hma a ngai lo tih a lang - MPYCC

Mizoram Pradesh Youth Congress Committee (MPYCC) chuan thuchhhuah siamin, Mizoram chu hripui buaipui kawnga hlawhchhamah an puh a, mipui mamawh hunlaia RT-PCR ngaihthah luiah an puh bawk.

MPYCC chuan mipui mamawh em em laia hmalakna awm si lo, tlai khawhnua district tina RTPCR khawl bun anih tur thu sawi a ni leh si chuan Mizoram sorkar chu nawr chawp ngai, mipuite hmakhaw ngai tak tak lo leh mahni party hamṭhatna ringawt ngaihtuah a ni tih a tih lan thu an tarlang.

Mizoram chu Covid-19 leng avangin khawvela inkharkhip rei ber kan nih tak thu tarlangin MPYCC chuan, "Chuti chung chuan hri umbo a hnekin a pung tulh tulh a, a mawhphurtu ber sorkar tan a mualpho thlak hleah kan ngai. Hripui leng meka inbuatsaihna leh inhmakhuana kawngah sawrkar a hlawhchham chiang hle," an ti.

Congress ṭhalai chuan sorkarin miretheite chhawmdawl a, Covid-19 avanga chhungkaw harsate khaichhuahna tur, sorkar sumbawm aṭangin ṭanpuina scheme duan pakhat mah a nei lo tih tarlangin, "Covid-19 do na kawngah mahni state budget hmang ṭha duh lo leh hmang tlem ber kan ni te hi a zahthlakin, state budget sum hmang mang si loa, sum harsatnaah Covid-19 an chhuanlam leh zel si te hian MNF Sorkarin financial management a a fail zia a ti chiang," an ti.