Covid-19 inkaihhruaina thar tichhuak

State Executive Committee chairman Lalnunmawia Chuaungo, chief secretary chuan October 1, Zirtawpni khan Aizawl Municipal Corporation (AMC) leh Mizoram chhung hmun danga hman tur Covid-19 inkaihhruaina (SOP) a tichhuak a, October 3 - 16, 2021 zanlai dar 12 thleng hman tur a ni.

Inkaihhruaina hi thlahdul niin SOP hmasaa tih phal lohṭkhap eng emaw zat chu phal a ni tawh. Pathianniṭ Sabbath ni chhunah biak-in a leng zat chanve (50%) aia tam lo inkhawm phal a ni a; AMC tih loh hmun dang Covid-19 hri kai awm lohna khuaah DC in thuneitute be rawnin zirna in a hawng thei.

AMC huam chhungah inkaihhruaina hi tih khauh bik a ni a, Mizoram hmun dangah chuan DC-te'n an district chhunga hri len dan dinhmun a zirin inkaihhruaina an siam thei ang.

AMC Chhunga Inkaihhruaina ṭhenkhat :
▶ Loh theih loh thilah lo chuan páwna chhuah leh inlènpawh khap a ni a, building khata in hrang hrang luahte pawh intlawhpawh phal a ni lo.
▶ Zan dar 8 aṭanga zinga dar 4 thleng curfew puan a ni.
▶ Zirna-inte hawn phal a ni lo a, training institute-te erawh a hmuna leng zat chanve (50%) luah khatin hawn phal a ni.
▶ Kohhran inkhawm chu chhunah biak-ina leng zat zatve (50%) inkhawm phal a ni a, zing leh tlai ṭawngṭai inkhawm pawh phal a ni. Zai erawh phal a ni lo.
▶ Kohhran inkhawmpui chhun lamah phal a ni. Biak-ina lêng zat zatve (50%) emaw, mi 200 aia tam lo tel phal a ni a, Covid-19 symptom neite tel loh tur a ni. Inkhawmpui thlengtu kohhranin task force-te nen SOP Implementation Committee an din ang. Zai phal a ni lo a, ruai buatsaih phal a ni lo.
▶ Inneih inkhawm leh mitthi vuinaah mi 50 emaw ṭhutnaa leng zat zatve (50%) tel phal a ni a, ei leh in sem phal a ni lo.
▶ Picnic spot chu mi 50 aia tam lo tan hawn phal a ni.
▶ LTF-te'n an remtih chuan public park-te hawn phal a ni.
▶ Sport practise chu indoor-ah mi 20 leh outdoor-ah mi 50 aia tam loin neih phal a ni.
▶ Zingṭtlai walking leh cycling phal a ni a, entu awm loin indoor leh outdoor-ah sports inelna, tournament, adt. neih phal a ni. Ṭhutnaa leng zat zatve (50%) emaw mi 50 aia tam lo punkhawm phal a ni.
▶ Gym-ah vawi khata awm thei zat aṭanga 50% aia tam awm phal a ni lo a, hmanruate phuh fai (sanitise) zel tur a ni a; hrûkpuan, tui, shaker leh mamawh dangte mahnia inken tur a nih bakah, Covid vaccine dose khat tal la tawh chauh kal phal a ni.
▶ Anniversary, birthday, adt. lawmna chu LTF-te'n an remtih chuan ṭhutnaa leng zat zatve (50%) emaw mi 50 aia tam lo in emaw neih phal a ni a, ruai buatsaih phal a ni lo.
▶ Mi 20 aia tam loin a huhoa lui kal, trekking, hiking, adventure sports, adt. tih phal a ni.
▶ Restaurant-te a hmuna ṭhutna zatve (50%)-ah customer neih phal a ni.
▶ Eichawp dawr, bazar leh hawker stall-te zing dar 5 aṭanga tlai dar 6 thleng hawn phal a ni.
▶ Sorkar, kohhran leh private office-te a pangngaia hawn phal a ni.
▶ Lirtheite intlân chhawk zel tur.