Ni hnih chhungin hripui vei mi 2,902 hmuhchhuah a ni

Mizoramah October 1, Zirtawpni khan Covid-19 vei mi 1,276 leh October 2, Inrinni khan mi 1,626 hmuh chhuah a ni a; ni hnih chhunga hrikai hmuhchhuah hi 2,902 a ni.

Sorkar laipuiin nimin zinga Covid-19 positive report a tihchhuaha a lan danin, Mizoram chu India rama hripui vei enkawl mek tam lamah palina a ni a, state pakhata hri vei hmuhchhuah tawh zawng zawng aṭanga chhuta enkawl mek tam lamah pakhatna a ni thung. Inrinni khan Mizoramah hripui vei dam tawh mi 907 chhuahtir an ni a; Zirtawpni zan aṭanga nimin tlai dar 5 thleng khan hripui vei mi paruk an thi.

Covid-19 vei October 1-a hmuhte chu ZMC laboratory-a hmuh chhuah 411, TrueNAT hmanga hmuh 58, RAT hmanga hmuh 1,137 leh Fluorescent Immunoassay (FIA) hmanga hmuh 20 an ni a; mipa 734 leh hmeichhia 892 an ni.

Inrinnia hripui vei hmuh chhuah 1,276 te chu mipa 608 leh hmeichhia 668 an ni a; ZMC-a hmuh chhuah 474, TrueNAT hmanga hmuh 59, RAT hmanga hmuh 716 leh FIA hmanga hmuh chhuah 27 an ni. IDSP record angin, Mizoramah Covid-19 vei 97,732 hmuh chhuah a ni tawh a, mipa 33,802 leh hmeichhia 32,884 an ni.

Kum 2011 chhiarpui aṭanga chhûtin Mizorama Covid-19 vei hmuh tawh 97,732 chu mi 1,000 zelah hripui vei mi 89 an awm ang a ni a; mi 1,00,000 zela Covid-19 vangin mi 26 an thi tawh ang a ni bawk. Nimin zinga sorkar laipui report angin Mizoram chu India rama state pakhata hri kai hmuh tawh zat aṭanga chhuta hripui vanga thi tlem lamah pahnihna a ni mek thung.