2013-17 inkarah ram dang mi hnenah Birth certificate 29 pek chhuah a ni

Kum 2013 aṭanga 2017 thleng khan Mizoram sorkarin birth certificate 1,10,349 leh death certificate 28,601 a pe chhuak a; kum 2013 leh 2016 inkar khan ram dang mi hnenah birth certificate 29 pek chhuah a ni.

Economics & Statistics department enkawltu Planning & Programme Implementation department chhinchhiah danin, kum 2013 aṭanga 2016 inkar khan ram dang mi 29 hnenah birth certificate pek chhuah a ni a, chungte chu Aizawl district aṭanga pek chhuah vek a ni.

Ram dang mi hnena Mizoram sorkarin birth certificate a pek chhuah dan chu - kum 2013-ah 17, kum 2014-ah panga, kum 2015-ah panga leh kum 2016-ah pahnih a ni a; kum 2017-a pek chhuah zat erawh an dawng lo.

Planning & Programme Implementation department tarlan danin, kum 2013-2017 chhunga Mizoram sorkarin birth certificate a pek chhuah zawng zawng 1,10,349 zingah Aizawl district tam berin, 46,251 pek chhuah a ni a, birth certificate pek chhuah tlemna ber Serchhip district-ah chuan 3,663 pek chhuah a ni.

Death certificate pawh Aizawl district-ah pek chhuah a tam ber a, 12,938 pek chhuah a ni a, pek chhuah tlemna ber Mamit district-ah 1,516 pek chhuah a ni.

Serchhip district chu birth certificate leh death certificate pek chhuah zat inthlauhna tlemna ber district a ni a, birth certificate 3,663 chiah pek chhuah a nih laiin, death certificate 1,530 pek chhuah niin, a inthlauhna chu 2,133 a ni.

Mamit district-ah chuan kum 2013 khan birth certificate (192) aiin death certificate (382) pek chhuah a tam zawk.