Anti Defection Law-in MDC-te a huam lo, MDC-te disqualify theihna dan a awm
Mizorama autonomous district council (ADC) pathuma member of district council (MDC)-te chu, political party danga inleh phal lohna dan Anti Defection Law-in a huam ve lo. Chutih laiin, MDC-te hnawl/paih (diqualify) theihna dan erawh a awm.
District Council & Minority Affairs (DCMA) department hotute hnen aṭanga Vanglaini thu dawn danin, ADC pathumte hian a hranpa ṭheuhin Constitution & Conduct of Bussiness Rules an nei. An rules neih ṭheuhah hian MDC-te chu Anti Defection Law-in a huam lo a; chutih rualin, MDC-te'n political party dang an zawm vanga disqualify theihna dan erawh an nei ṭheuh hlawm.
ADC-te dan hman laiah chuan MDC-te hian inthlana MDC atana an tlin hnuah inthlan dawna anmahni dintirtu political party ni lo an zawmin Anti Defection Law angin MDC aṭanga bàn theih an ni. Mahse, Anti Defection Law nena a danglamna chu, MDC-te'n political party an zawm chu seat awm zawng zawng aṭanga chhûta hmun thuma ṭhena hmun khat aia an tam chuan MDC-te chu disqualify theih an ni lo.
Hetih lai hian, independent-a MDC tlingte'n political party an zawm chuan MDC aṭanga disqualify theih an ni a, an duh chuan political party-te an thláwp thei thung.
DCMA hotute chuan, Constitution & Conduct of Bussiness Rules chu ADC-te'n an duh dan anga an duan a nih thu an sawi a, "Inrawlhna kan nei lo. Amendment siam pawh anmahni kut a ni a, anmahni'n ṭha tura an ngaih angin an duangin an tidanglam a ni," an ti.
Mara Autonomous District Council (MADC)-a Mara Democratic Front (MDF) MDC-te'n BJP an zawm chungchangah DCMA hotute chuan, MDF MDC-te hian BJP an zawm ni loin, MDF pumpui BJP-a an inchhûn luh avang leh MDF a awm tawh loh avangin MDC-te chu disqualify theih an nih loh thu Vanglaini an hrilh.