Tobacco Free Sports Campaign hawng

Mizoram State Olym­pic Association, Indian Society on Tobacco & Health (ISTH) Mizoram Chapter leh Mizoram State Tobacco Control Society (MSTCS) ten an buatsaih, 'Tobacco Free Sports Campaign' leh 'World No Tobacco Month' chu nimin khan CM Bangla Banquet Hall-ah chief minister Lal Thanhawla'n a hawng.

Chief Minister chuan, infiamna khawvelah Mizoramin hma a sawn zel tih sawiin, "International level inelna thleng phaa medal la thei infiammi chhuanawm tak tak an awm chho a, chu'ng hlawh­tlinna tiṭhuanawp theitu pakhat hriselna ngaih pawimawh tâwk loh leh nun uluk nacháng hriat loh a ni," a ti a; vaihlo tel loa infiamna kalpui tura hmalakna a pawimawh avangin hlawhtling ngei se a duh thu a sawi.

Mizoramah infiammite chu naupang tê tê tan thlenga an entawn leh mi mit fûkna an nih avangin an hma lam hun atana an invawn a pawimawh piah lamah, mi dang tan entawntlak an nih a pawimawh thu sawiin Lal Thanhawla chuan, "Chutiang bawk chuan, anmahni enkawltu te, official leh administration lama awmte pawh player-te tana entawntlak an nih a ngai," a ti.

CM Lal Thanhawla chuan, WHO report-a a lan danin, ruihhlo hrang hrang vanga thihna hrang hrang thleng aiin vaihhlo zûk leh hmuam vanga thi khawvelah an tam zawk thu tarlangin, "Mizo zingah zûk leh hmuamin hriselna a tihchhiat nasat theihzia hi inhrilhhriat belh kan la ngai hle a ni," a ti a; ṭhahnemngaite hmalakna azarah hma sawn hret hret a nih thu a sawi.

ISTH Mizoram Chapter president Lal Riliani pawhin thu sawiin, vaihlo leh a kaihhnawih zûk leh hmuam chite chu ruihhlo ṭha lo tak tak tihna kawng hawngtu an nih thu a sawi a, "Ram changkang apiangin zûk leh hmuam an do nasa. Nunna leh hriselna a tihchhiatzia hre mah ila, ngaihmawh lehzual kan ngai," a ti.

Inkhawm hi Mizo­ram State Sports Coun­cil secretary C Laltlan­thanga'n a kaihruai a, National Tobacco Control Programme-a state nodal officer Dr Jane Ralte-in 'Tobacco Free Sports' chungchang leh hmalak dan tur a sawi. Chawhnu lamah workshop neih chhunzawm a ni.

Global Adult Tobacco Survey (GATS) 2016-17 tarlan danin, India state hrang hrang vaihlo hman uar dan khaikhinnaah Mizoram chu 58.7% niin, pahnihna a ni. Pakhatna chu Tripura a ni a, GATS Re­port 2010-ah chuan Mizo­ram chu India rama vai­hlo hman tamna ber a ni.