KHAWTHLIR

Mizoram Kailawn
NEDP hnuaia hmalakna pakhat, Mizoram Kailawn, 2018 chungchang inhrilhfiahna hun nimin khan Serchhip DC conference hall-ah buatsaih a ni. Inkhawm hi Serchhip additional DC Chuauhnuna'n a kaihruai a, master trainer Dr Lalbiakzuali'n Mizoramin entrepreneur ṭha a mamawh dante a sawifiah.

Truck-in chíl hlum
April 30, Thawhṭanni zan dar 8:30 vel khan Vaivakawn Zohnuai kawngah Vaivakawn lam pana scooty-a tlân Zorinsanga (25) s/o Biakthansanga, Hlimen chu Vaivakawn pana tlan ve tho truck ke 16 nei, CG-04 JE-0443 in a khabe báwr velah a chíl a, Zorinsanga hi ká chhawn lohin a hmunah a thi. Truck driver leh handyman-te an tlanbo a, he thu ziah lai thleng hian police-in an la man lo.

Thisen pe
Lunglei Higher Secondary School NSS chuan nimin khan an sikulah blood donation camp an huaihawt a, Lunglei Civil Hospital tan hmeichhia 19 leh mipa 17-te'n thisen unit 36 an pe.

PMMVY zirho
Lawngtlai ICDS Project hnuaia anganwadi worker-te tan nimin khan Lawngtlai DRO Conference Hall-ah nu leh naute hriselna atana sorkar laipui scheme, Pradhan Mantri Matru Vandana Yojana (PMMVY) chungchang zirhona buatsaih a ni. PMMVY hi hmeichhia, nau pai leh nau pawmte'n hriselna leh inenkawlna lam an ngaihthah vanga nu leh nausen thihna thleng tam tak tihziaawmna atana ruahman a ni.

Paih dawn
Champhai Taxi Owners Association-te April 30, Thawhṭannia Champhai Vengsang Hall-a ṭhukhawm chuan, an member lirtheia sorkar phal loh, ruih theih thil phur leh ti man an nih chuan, motor neitu chu an member aṭanga paih ni se, an ti.