CADC-a sorkar tur a la chiang lo

Chakma Autonomous District Council (CADC) inthlan neih zawh tâkah sorkarna siam tur a la hriat theih loh a; District Council & Minority Affairs (DCMA) department chuan Governor chu thutlukna siam turin document pawimawhte an thawn tawh.

DCMA department hotute hnen aṭanga thu dawn danin, BJP leh Congress party MDC-te'n leader atana an thlan Santi Bijan Chakma chuan DCMA Secretary hnenah lehkha thawnin, chief executive member (CEM) atana ruat tur leh sorkarna siamtir turin a ngen.

A ngennaah hian attendance sheet a thil tel a, declaration signature a thil tel loh avangin a nung (valid) lo thung. Hemi chungchang hi ṭawngkain an hrilh leh tawh a, Congress MDC-te chuan signature an thehlut tawh a, BJP MDC-te erawhin an la thehlut lo thung.

Hetih lai hian, MNF MDC lam pawhin Governor hnenah sorkarna siamtir turin April 28, 2018 khan an ngen ve bawk. MNF Legislature Party leader RM Chakma chuan, Governor-in sorkarna siam tura a tih chuan fiahna, vote of confidence a paltlang thei dawn niin a sawi a, "Congress-in CADC-a MNF sorkar an hlauh em em chhan chu, an sorkar kha corruption-in an khat a, chhui­chhuah an hlau em a ni," a ti.

Ngenna pahnih awm chungchangah hian DCMA department chuan nimin khan Governor hnenah document pawimawhte nen a ṭul anga sorkarna siam tur ko tura rawtna an thlen a; sorkarna siam tum pahnih an awm avangin House-a vote lak mai pawh a ṭul mai theih thu an thlen tel a ni.

State Election Commission (SEC)-in ruahmanna a siam dan chuan, CADC sorkar thar meeting hmasa ber chu May 4, 2018 hmaa neih tur a ni. Vanglaini zawhna chhangin SEC hotute chuan, May 4 hmaa meeting neih theih a nih loh chuan hun an pawhsei leh mai tur thu an sawi.

Hetih lai hian CADC -a MNF MDC pariatte chuan nimin khan District Council & Minority Affairs secretary Rodney L Ralte chu a pisaah hmuin, April 28, 2018-a Governor hnena lehkha an thehluh tawh, CADC-a sorkar siamtir tura an ngenna chu tihhlawhtlin thuai ni se an duh thu an thlen. DCMA Secretary chuan, CADC-a sorkar siam tur chungchanga thu kal mekah vawiin May 2 hian thutlukna hriat theih beisei a nih thu a lo hrilh.

Rodney L Ralte hian MNF MDC-te chu CADC sorkar siam tur chungchangah rawtna pahnih siam a nih thu leh buaipui mek a nih thu a lo hrilh a; rawtna pahnihte chu - MNF MDC-te ngenna anga 'floor test' neih leh, Congress leh BJP MDC-te'n an din United Legislature Party-te sorkarna siam tura sàwm a nih thu a sawi.Sorkar hmalak mekna chu Chief Minister-ah kal phawt tur a nih thu leh, chuta ṭang chuan Governor hnena thleng tur a nih thu a sawi bawk.

Tarlan tawh angin, CADC-a seat 20 awm zinga 19-ah inthlan a ni a, MNF-in seat 8, Congress-in seat 6 leh BJP-in seat 5 an la. MNF leh BJP President-te'n sorkar inṭâwm siam an tum thu an puan tûkah, Congress leh BJP-te chuan sorkarna siam an tum thu an puang ve leh a ni.