Quality viltute an ṭhukhawm

State Level Committee for Standardization, Quality Control and Quality Systems chu nimin khan an chairman Arvind Ray, chief secretary hoin Chief Secretary pisa conference hall-ah an ṭhukhawm.

Chief Secretary chuan, ram chhunga thil siam chhuahte leh ram páwn aṭanga thil hrang hrang lak luhte chu a ṭhain a rintlak em tih hriat chian a ṭul thu a sawi a, "Bureau of Indian Standards (BIS) pawimawhna sorkar hnathawk leh mipuiin kan hriat a, inhrilhriatna neih tam a ṭul. BIS pawimawhna hriat­na aṭangin quality ṭha leh rintlak lehzual hmanna a thlen dawn a ni," a ti.

Meeting-ah hian bung­rua leh hmanrua lak luhah BIS chhin­chhiahna (ISI mark) awm chiah la lut tura ṭan lak a ngaih thu te, department hrang hrangte'n BIS chhin­chhiahna (ISI mark) leh BIS pawimawhna an hriat theih nan training emaw inhrilhhriatna hun buatsaih a ṭul thute sawiho a ni.

BIS chhinchhiahna awmna rêng rêng a ṭha tawk lo emaw, a rintlak lo emaw a nih chuan, BIS office hnai berah sawiselna thehluh theih a nih thu tarlan a ni a; tun dinhmunah hian Koinonia Water Plant, Mizoram Ispat Industries leh Zoram Beverages ten BIS chhinchhiahna an nei tawh a ni.