Borkhola Bottling Plant tihlen vangin Mizoramah gas a harsat phah - IOC
Tunlaia Mizorama eirawngbawlna gas hnianghnar taka hmuh harsatna chhan chu, Silchar bula Borkhola Gas Bottling Plant tihlen hna thawh vang niin IOC hotuten an sawi.
IOC hotute sawi danin, Borkhola Gas Bottling Plant hi ni khata gas a thun theih zat a leta tama tihpun mek a ni a, he hna hi May 15, 2018 velah chuan zawhfel theih beisei a ni a, hemi hnu hi chuan Borkhola aṭanga eirawngbawlna gas la ṭhinte tan gas bur tam tawk lak chhuah tur a awm thei tawh ang. Mizorama gas harsatna pawh a sutkian beisei a ni.
Hetihlai hian Aizawl district ni lo, district dangte chawmtu Mualkhang Gas Bottling Plant-ah erawh chuan gas phur chhuaktu tura IOC contractor thlan mi pathumten rate hniam lutuka an chhan avangin gas phur duh motor tam tawk hmuh a la harsa reng a, hei vang hian hmun hrang hrangah harsatna a la thleng a, chung zingah chuan Serchhip, Lunglei, Siaha leh Mamit leh Champhai district te a tel a ni.
Tarlan tawh angin kum 2017-2018 chhung atana IOC-in Mualkhang aṭanga gas sem tur district hrang hranga phur chhuak tura contractor a thlan pathumte chuan gas cylinder pakhat km. 1 phurh nan paise 12.83-a an chhan avangin gas phur duhtu an hmu tlem a, hei hian harsatna a siam a ni.
Mizoram sorkarin tender chhuah ṭha thuai tura IOC a ngenna chu IOC hian tihlawhtling rih loin, an tender chhanna nun chhung pawhsei sak an tum loh thu an sawi thung. Gas phurh man atana IOC rate pawm theih sang ber chu cylinder khat km. 1 zel phurh nan paise 17.55 a ni.