Hachhek-ah bial mi ngei candidate duh

Hachhek Constituency Development Committee (HCDC) leh an huam chhung khaw hrang hrang welfare leh zirlai pawlte chuan resolution siamin, kumina Assembly inthlan lo awm turah an bial chhung mi leh Zo hnahthlak ngei candidate rawn dah turin political party tin an ngen tih an tarlang.

HCDC kaihhruaia April 30, Thawhṭannia Hacchek bial chhunga khawtlang hruaitute ṭhukhawm chuan, an bial chhunga hna thawhte ṭha taka thawh ni se an duh thu tarlangin, "Hachhek constituency huam chhunga sorkar hnathawh mek leh thawh tur awmte ṭha taka thawh a nih theih nan hna thawktute kan ngen a, HCDC-in a ṭul angin enpui zel rawh se," an ti.

An resolution chuan, an bial chhung Thinghlun khaw bula dan lo leh sorkar hriatpui loha Bru khua Baijirungpa a awm chu ṭha lo an tih thu sawiin, "Inthiarfihlim turin kan ngen a, sorkar thuneitute hnena kan ngen tawh angin, an hmalakna kan ngaichâng reng a ni," an ti a; sorkar aṭanga hmalakna duhthusam a awm loh chuan a ṭul anga hma an lak tur thu an tarlang.