Zokhawthar - Champhai maxicab dang
Zokhawthar khawtlang chuan Zokhawthar to Champhai inkara maxicab chuan man a sang lutuk nia ngaiin, an duh lohzia lantirna atan April 30, Thawhṭanni aṭang khan maxicab service-te an dang.
Zokhawthar V/C kaihhruaia public meeting neih chuan an beisei anga Zokhawthar leh Champhai inkara maxicab chuan man kalpui a nih hma chuan Zokhawthar leh Champhai inkarah maxicab tlante service tir loh ni se, tiin thutlukna an siam a, an thutlukna bawhzuiin Thawhṭanni aṭang khan maxicab service an dang a ni.
An hmalakna chu mipui tana ṭhatna tura ti an nih avangin mipuite chu thláwp tur leh harsatna an tâwk a nih pawhin tuar hram hram turin Zokhawthar khawtlang hruaitute chuan mipui an ngen.
Zokhawthar khawtlang hruaitute sawi danin, maxicab welfare-in khawtlang hruaitute nen chuan man chu DTO office-ah Rs. 50 aṭangin Rs. 85-ah an bituk a, chu chu bawhchhiain, maxicab welfare-te chuan Rs. 100-ah an tisang a; kawng chhiat chhung atan Rs. 100 aṭangin Rs. 150-ah an tisang leh a ni.
Zokhawthar khawtlang chuan, Champhai leh Zokhawthar inkara maxicab service-te chu chuan man Rs. 100 aia tam loa an tihhniam leh hma chuan tlantir an tum tawh loh thu te, Champhai leh Zokhawthar inkara fare Rs. 100 aia sang service lui tu pawhin harsatna an tâwk a nih pawhin anmahni cho chhuah a nih tur thute leh, an hmalaknaah boruak a fel hma chu counter neitute chu an dawr hawng lo tura an ngen thute an tarlang.