Technical zirtur thlanna dan dodalna PIL Chakma Zirlaite thehluh HC-in titawp
Gauhati High Court chuan, Mizoram Chakma Students Union (MCSU)-in public interest litigation (PIL) an thehluh vanga The Mizoram (Selection of Candidates for Higher Technical Courses) Rules, 2016 hman theih hrih lo tura a dah (stay)-na chu nimin khan a titawp.
He thubuai chungchanga Mizoram sorkar aiawha ukil inlan ṭhin JC Lalnunsanga hnen aṭanga thu dawn danin, thubuai ngaihtuahnaah hian MCSU-te ukil a inlan ngai loh avangin Court chuan thubuai hi a titawp a ni. MCSU-te ukil hi Court-ah a inlan ngai loh avangin Court chuan April 23, 2018 khan Registrar chu telephone hmanga inlan tura hrilh turin a hriattir tawh a ni.
Registrar hian MCSU-te ukil chu telephone hmangin inlan turin a hrilh a, mahse, a inlan chuan loh avangin Court chuan nimin khan he thubuai hi a titawp ta a ni. Court-in stay order a tihtawp tâk avang hian The Mizoram (Selection of Candidates for Higher Technical Courses) Rules, 2016 chu a hman leh theih tawh dawn niin thu dawnna chuan a sawi.
Higher & Technical Education (HTE) department chuan kum 2015 khan Mizoram (Selection of Candidates for Higher Technical Courses) (Sixth Amendment) Rules, 2015 a tichhuak a; chu chu MCSU-te'n duh loin, Gauhati High Court-ah an khing. Mahse, Mizoram sorkarin Rules chu July 16, 2015-ah a hnûkkîr a, Chakma-te chu Category-I ah a dah avangin High Court pawhin PIL chu a titawp a ni.
HTE department-in April 20, 2016-ah Mizoram (Selection of Candidates for Higher Technical Courses) Rules, 2016 a tichhuak leh a, Chakma-te chu Category-I aṭangin Category-II ah dah an ni. Hei vang hian MCSU chuan Gauhati High Court-ah PIL an thehlut leh a, High Court chuan hun eng emaw chen Rules hi a stay hnuah nimin khan a stay-na a hnukkîr ta a ni.
High Court-in hman a phal leh tâk Mizoram (Selection of Candidates for Higher Technical Courses) Rules, 2016, April 20, 2016-ah hian Category-I ah Mizorama Zo hnahthlakte (Zo-ethnic) dah niin, an tan seat 95% zuah a ni a; Category-II ah Zo hnahthlak lote dah niin, an tan seat 4% zuah a ni. Seat 1% chu Mizorama cheng, Central sorkara thawk fate tan dah a ni bawk.
July 19, 2017 khan National Eligibility & Entrance Test (NEET) kaltlanga Mizoram quota-a MBBS leh BDS zir tur thlannaa Category-I ah Chakma zirlai paruk leh vai pakhat an awm ve duh loh lantir nan MZP-te'n HTE department-a Technical Wing pisaah MBBS leh BDS counselling neih tur an lo dang tawh.
MZP-te'n lungawi lohna an lantirna kal zelah Mizoram sorkar chuan councelling-naah Chakma zirlaite chu a ko ve tawh lo a, hei vang hian buaina chhuak zui loin Mizo zirlaite chauh Mizoramah quota-a MBBS leh BDS zir tura tirh a ni.