Loneitute tan workshop buatsaih

Agricultural Technology Management Agency (ATMA) chuan nimin khan Mizoram hmun hrang hrangah Kissan Kalyan Karyashala (Workshop on Farmers’ Welfare) an buatsaih.

Kissan Kalyan Karyashala hi Aizawlah chuan DAO conference hall-ah buatsaih niin, Lok Sabha MP CL Ruala'n a hmanpui a; MP chuan, kum 2022-a loneitute hlâwkna a lêta a pun theihna turin ram chhunga mi thiam te, ram leilung leh sik leh sá azira thlai chîn tur loneitute kawhhmuh theitute an pawimawh thu a sawi a, loneitute leh kuthnathawktute'n hlâwk taka hna an thawh theihna turin a kaihhnawih department hotute leh mithiamte chu ṭha­hnemngai taka hma la turin a fuih.

Workshop hi Tlangnuam block technology manager Dr H Lalbiaksangi'n a kaihruai a, Tlangnuam BDO Andy Lalfak­zuala Varte-in Kissan Kalyan Karya­shala chungchang a sawifiah. Chawhnu lamah scien­tist-te leh Tlangnuam RD Block chhunga loneitute mi 100 chuang kalkhawmte an inkâwm a ni.

Kisan Kalyan Karyashala Champhaiah chuan Kahrawt community hall-ah buatsaih a ni a; khuallian TT Zothansanga, Champhai North bialtu MLA chuan, loneitute kutah thui takin sorkar a innghat tih sawiin, "An tana ṭha tur hmanruate sorkarin a pe ṭhin. Leilung mila hmasawnna kalpui a ṭul a, tuihna ṭha nei turin ramngaw humhalh a ngai," a ti.

Chawhnu lamah technical session buatsaih a ni a, hemi chhung hian AH&Vety depart­ment chuan Animal Health Camp an buatsaih a ni.

Kawnpuiah pawh Awithangpa Hall-ah Kisan Kalyan Karyashala buatsaih a ni a; khuallian, bialtu MLA Hmingdailova Khiangte chuan,"NLUP leh NEDP hmanga sorkar hmalaknain rah a chhuah mek. Congress sorkar chuan hralh chhuah tham thlai thar a buaipui a, reiloteah kan hmu thuai dawn a ni," a ti.

Kisan Kalyan Karyashala hi Serchhipah pawh BNRGSK Hall-ah buatsaih a ni a, BDO Vanlalhmachhuana'n a hman pui. Inkhawmah hian loneitu hlawhtling thlanchhuah mi 10 te hlawhtlin dan chanchin ngaihthlak niin, heng mite hi chawimawina thuziak leh pawisa Rs 2,000 ṭheuh hlan an ni.

Ministry of Agriculture & Farmers Welfare chuan kum 2022-a loneitute hlâwkna a lêta tihpun tumin hma a la a, he hmalakna hi Prime Minister chhawpchhuah niin, thlai chînte'n an mamawh ang zela tui hnianghnar taka pek te, thlai thar chhuah dahṭhatna tura warehouse leh cold chain tam zawk neih te, thlai thar chhuahte food processing hmanga an hlutna tihhmasawnte leh ar vulh, khuai khawi tihmasawnte a huam a ni.